Bu yil 35 ming nafar fuqaro chet elga ishlash uchun jo‘natildi – Tashqi mehnat migratsiyasi agentligi

2022-yilning o‘tgan davrida 35 minga yaqin o‘zbekistonlik Rossiya, Qozog‘iston, Janubiy Koreya, Germaniya, Angliya va boshqa Yevropa davlatlariga ishga jo‘natilgan. Bu haqda AOKAda bo‘lib o‘tgan matbuot anjumanida Tashqi mehnat migratsiyasi agentligi boshlig‘i Afzal Ermatov ma’lum qildi.

Afzal Ermatovning aytishicha, aksariyat o‘zbek muhojirlari maxsus malaka talab qilinmaydigan korxonalarda ishlamoqda.

Joriy yilning boshidan 340 ga yaqin chet ellik yirik ish beruvchi agentliklar bilan migratsiya sohasida hamkorlik qilish bo‘yicha muzokaralar olib borildi. Turli yo‘nalishlarda kelishuvlarga erishildi. Rossiya, Qozog‘iston, Janubiy Koreya, Turkiya va Yevropaning turli davlatlaridan qurilish, ishlab chiqarish va xizmat ko‘rsatish sohalarida ishchilar jalb qilinmoqda. Ishchilarga bo‘lgan talab ancha yuqori.

Hozirgi vazifamiz xalqaro mehnat talablariga javob beradigan nomzodlarni tayyorlash. Chunki ko‘plab chet el tashkilotlari maxsus malaka talab qiladi. Shuning uchun biz xorijga ishlash uchun ketayotgan fuqarolarn turli kasblar va chet tillariga o‘qitish ishlarini olib boryapmiz. Masalan, bu bo‘yicha respublikada 17 ta “Ishga marhamat” monomarkazlari faoliyat yuritmoqda. Shu bilan birga, 150 dan ortiq kasb-hunarga o‘qitish markazlari, 10 ga yaqin chet tiliga o‘qitish markazlari ishlamoqda.

Joriy yilning o‘tgan davrida 35 minga yaqin yurtdoshlarimiz Rossiya, Qozog‘iston, Janubiy Koreya, Germaniya, Angliya va boshqa yevropa davlatlariga, manzilli va tashkillashtirilgan tartibda ishga jo‘natilgan.

Avvalroq Rossiyada 200 ming nafar o‘zbekistonlik norasmiy ishlayotgani ma’lum qilingandi. Shuningdek, Bandlik va mehnat munosabatlari vazirligi boshqarma boshlig‘i Zohid Asqarov ayrim firibgarlar chet elga ishlash uchun yuborishini aytib fuqarolardan 6 ming dollargacha pul olayotgani, aldanganlar puldan ham, xorijda ishlashdan ham quruq qolayotganini aytgandi.