Наманганлик депутат Музаффар Жамолиддиновнинг Facebook’даги саҳифасига жойланган ҳамда электр ва газдан шикоят қилганларга «иссиқ ва ёруғ камералар» ҳақида эслатилган пости ижтимоий тармоқларда кескин эътирозларга сабаб бўлди. Пост кейинчалик ўчириб ташланган бўлса ҳам, унинг атрофидаги баҳс-мунозаралар ҳали тинганича йўқ. «Дарё» мухбири Азизбек Абдувалиев депутат билан учрашиб, мазкур чиқишдан кўзланган мақсад-муддао ҳақида сўради.
«Постимга шунчалик эътибор қаратилишини ўзим ҳам кутмагандим»
Бундан 5 йил аввал, 2017 йили 10 ой давомида қамоқ эҳтиёт чорасида сақланганман. Суд тугаганидан сўнг озодликка чиққанман ва кейинчалик судланганлик ҳолати олиб ташланган. Шундан келиб чиқиб, ҳаётда электр ва газ танқислигидан ташқари бошқа ташвишлар ҳам борлиги, уларнинг олдида бу муаммолар у қадар аҳамиятли эмаслигини назарда тутиб, пост қўйгандим. Лекин барча ҳам мени танимаслиги, ўтмишимдан хабардор эмаслиги, бошқача тушунишлари мумкинлигини ўйлаб кўрмаган эканман.
Постни кечки пайт жойлагандим, чарчаган эканман, кўзим илинибди. Орадан икки-уч соат ўтиб қарасам, постнинг остида 1,5 мингдан ортиқ изоҳ турибди. Уларнинг аксарияти ўта салбий эди. Тўғриси, буни ўзим ҳам кутмагандим — шунча одам мени кузатиши, фикримга муносабат билдиришини. Шундан сўнг бу постни ўчириб ташладим ва кейинроқ асл мақсадим баён қилинган иккинчи постни жойладим. Лекин унга деярли ҳеч ким эътибор бермади, тушунишни ҳам истамади. Биргина «Дарё» нашрида ушбу изоҳ чоп этилди, бунинг учун таҳририятдан миннатдорман.
«Депутатлик сўровларимнинг катта қисми айнан газ, электр, сув ва йўл муаммоларига тегишли»
Кўпчилик фикрларимни очиқдан очиқ таҳдид сифатида қабул қилибди. Бунга ваколатли шахс, яъни жазоловчи орган одами бўлмасам, қандай қилиб кимнидир қўрқитишим мумкин? Депутат ўзи асли халқ вакили бўлса. Депутатлик фаолиятим давомида 16 нафар фуқарога нисбатан қўзғатилган жиноят ишларида жамоатчилик ҳимоячиси бўлиб иштирок этган эканман. Улардан 6 нафарини кафиллигимга олганман. Уларга қамоқ билан боғлиқ бўлмаган жазо тайинлаш ҳақида судларга киритган илтимосномаларим қаноатлантирилиб, ўша фуқаролар ҳозир очиқда, ишлаб, ўқиб юрибди.
Депутатлик давримда, яъни 2019 йилдан бери турли идора ва ташкилотларга 19 та депутатлик сўрови, 32 та мурожаат йўллабман. Улар орасида айнан ўша газ, электр, сув ва йўл муаммолари бор.
Вилоятда йўл учун ажратилган маблағнинг катта қисми депутатлик ҳудудимга тўғри келар экан. Иккита маҳаллани ўзида 17 километр асфальт бўлибди. Тўғри, булар давлат маблағи билан бўлади, лекин бунинг ортидан кимдир елиб-югуриши, дастурларга киритиш учун жон куйдириши керак-ку?
«Кимгадир маддоҳлик қилишга эҳтиёжим йўқ»
Айрим изоҳларда мени «маддоҳ» деб аташибди. Кимгадир маддоҳлик қилишга эҳтиёжим йўқ, чунки тадбиркорлик билан шуғулланганман, маблағим етарли. Полиграфия ва дарвоза тайёрлаш корхоналаримиз бор, қўл остимизда 50 нафардан ортиқ одам ишлайди. Аслида жавобгарликка тортилишимга ҳам шу тадбиркорлик фаолияти сабаб бўлган. Очиғини айтаман, 5-6 йил аввал ҳозирги инсонпарварлик сиёсати ва тадбиркорларга ижобий муносабат бўлганида бундай қора кунлар бошимга тушмасди ҳам. Ота-онам, оиламни ҳақорат қилишибди. Уларда нима айб? Ота-онам мен ва укаларимни эл корига ярайдиган инсонлар этиб вояга етказишга ҳаракат қилишган, биз билан доим фахрланишни исташади.
«Бошимдан ўтганлари катта сабоқ бўлди»
Асосий хулоса шуки, нафақат депутат, балки ҳар қандай одам чиқишларига, ижтимоий тармоқларда жойлаётган постларига эътиборлироқ бўлиши керак экан. Шахсий ҳаётидаги муаммоларни халқ ташвиши билан аралаштирмаслиги ва бу орқали омманинг ғазаб-нафратини қўзғатмаслиги керак экан. Сўзларимни нотўғри тушунган барчадан бунинг учун яна бир бор узр сўрайман.
Бошимдан ўтганлари мен учун катта сабоқ бўлди. Ўзим қўйган пост ортидан юзага келган талқин ва танқидларни муҳокама қилиб ўтирмасдан, депутатлик ваколатимни муддатидан аввал тугатиш ҳақида ариза бердим. Энди уни кўриб чиқиш кенгашга ҳавола.
Мавзуга доир: Электр ва газдан шикоят қилган фуқароларни қамоқ билан «огоҳлантирган» депутат ўз хоҳишига кўра ариза ёзди
Изоҳ (0)