Ijtimoiy tarmoqlarda Farg‘onadagi maktablardan birida kuchli portlash sodir bo‘lgani to‘g‘risida xabarlar tarqaldi. FVV matbuot xizmati buni rad etdi.
Ma’lum qilinishicha, 6-dekabr kuni soat 11:30 da Farg‘ona shahridagi 41-maktab va 63-bog‘chaning umumiy isitish qozonxonasida yorilish sodir bo‘lgani to‘g‘risida viloyat FVBga xabar kelib tushgan.
Shunga ko‘ra, voqea joyiga Farg‘ona shahar FVB, “Hududgaz Farg‘ona” gaz ta’minoti, “Hududiy elektr tarmoqlari” hamda sohaviy xizmatlar xodimlari chiqib, vaziyat o‘rganilgan.
Dastlabki o‘rganish natijalariga ko‘ra, isitish qozonxonasida texnologik jarayonning buzilishi oqibatida qozonda ichki bosim ortib ketgan va yorilish sodir bo‘lgan. Oqibatda qozonxona binosi yengil shikastlangan.
Shuni takidlab o‘tishimiz kerakki, voqea natijasida yong‘in qayd etilmagan. Vaziyat natijasida tan jarohati olganlar yoki vafot etganlar yo‘q. Ayni vaqtda huquqni muhofaza qilish organlari tomonidan voqea sabablari va zarar miqdori o‘rganilmoqda, — deyiladi xabarda.Ijtimoiy tarmoqlarda go‘yoki sohaviy xizmatlardan birining vakillari tomonidan ushbu voqea haqida guvohlardan oshkor qilmaslik to‘g‘risida tilxat olingani haqida ham ma’lumot tarqalgan. Favqulodda vaziyatlar vazirligi o‘z xodimlari tomonidan bunday harakatlar amalga oshirilmaganini bildirdi.
Mavzuga doir:
Izoh (0)