Surxondaryo viloyati Boysun tumanida 51 tup daraxt noqonuniy kesib ketilgani aniqlandi. Bu haqda viloyat Ekologiya va atrof-muhitni muhofaza qilish boshqarmasi xabar berdi.
Ma’lum qilinishicha, Surxondaryo viloyati Ekologiya va atrof-muhitni muhofaza qilish boshqarmasi mas’ul inspektorlari va Milliy gvardiya xodimlari bilan birgalikda daraxt kesuvchilarga qarshi tezkor reyd tadbirlari o‘tkazmoqda.
Shunday reyd tadbirlari davomida Boysun davlat o‘rmon xo‘jaligi Machay o‘rmon bo‘limi xodimlarining xizmat vakolatiga sovuqqonlik bilan yondashishi, yuklatilgan mas’uliyatni suiste’mol qilishi natijasida Machay o‘rmon bo‘limining 5-aylanma 17-kvartalining “Yetimtol” va “Almali” massivlarida mavjud bo‘lgan Zarafshon archa, Shumtol, Uchqad , Zarang jami 51 ta daraxt noqonuniy ravishda tag qismi bilan kesib tashlangani aniqlangan.
Oqibatda “O‘simlik dunyosini muhofaza qilish va undan foydalanish to‘g‘risida”gi qonuning 37-moddasi talablari buzilib, o‘simlik dunyosiga 560 million 550 ming so‘m miqdorda zarar yetkazilgan.
Ushbu holat yuzasidan to‘plangan hujjatlar huquqiy baho berish uchun prokuraturaga yuborilgan.
Izoh (0)