Xitoy mudofaa vaziri Vey Fenxe Pentagon rahbari Lloyd Ostin bilan Ukrainadagi harbiy amaliyot va Tayvan atrofidagi vaziyatni muhokama qildi, deb xabar bermoqda Xitoy Mudofaa vazirligi matbuot xizmati.
“Tomonlar xalqaro va mintaqaviy vaziyat, Ukrainadagi inqiroz, Janubiy Xitoy dengizi va Koreya yarim oroli muammosi yuzasidan fikr almashdi”, — deyiladi muassasa xabarida. Pentagon matbuot xizmati esa AQSH ham, Xitoy ham yadro qurolidan foydalanish yoki undan foydalanish bilan tahdid qilishni qoralagani haqida xabar berdi.
Lloyd Ostin va Vey Fenxe, shuningdek, AQSH va Xitoy o‘rtasidagi ikki tomonlama munosabatlarni muhokama qildi. Pekin bunda Tayvanni asosiy mavzu deb atagan.
“Xitoy mudofaa vaziri Vey Fenxe Tayvan masalasi Xitoyning asosiy manfaatlarining o‘zagi va Xitoy—AQSH munosabatlaridagi qizil chiziq ekanini ta’kidladi. Tayvan bu — Xitoy, Tayvan masalasini hal qilish Xitoy xalqining shaxsiy ishi va hech qanday tashqi kuch bunga aralashishga haqli emas”, — deyiladi Xitoy Mudofaa vazirligi bayonotida.
O‘z navbatida, Ostin AQSHning “Yagona Xitoy” siyosatiga sodiqligini ta’kidladi. “U (Lloyd Ostin) status-kvodagi bir tomonlama o‘zgarishlarni rad etishini ta’kidladi va XXRni Tayvanga qarshi yanada beqarorlashtiruvchi harakatlardan tiyilishga chaqirdi”, — deyiladi Pentagon sayti bayonotida.
Avgust oyida Vakillar palatasi spikeri Nensi Pelosining Tayvanga tashrifidan keyin Pekin va Vashington munosabatlari yomonlashgan edi. Xitoy uning kelishini davlatning ichki ishlariga aralashish deb hisobladi: Pekin Tayvan mustaqilligini tan olmaydi va orolni o‘z hududining bir qismi deb biladi.
Xitoy yetakchisi Si Szinpin G20 sammitida AQSH prezidenti Jo Bayden bilan ikki tomonlama uchrashuvda Tayvan masalasini Xitoy—AQSH munosabatlaridagi asosiy qizil chiziq deb atagan.
Izoh (0)