Kreml Rossiya prezidenti Vladimir Putin va qisman safarbarlikka chaqirilganlarning oilalari bilan ushrashuv o‘tkazishga tayyorlanmoqda. Bu haqda “RIA Novosti” xabar berdi.
Ma’lum qilinishicha, uchrashuvda harbiy xizmatchilarning onalari ham ishtirok etadi.
“Bunday uchrashuv rejalashtirilgan, tasdiqlashimiz mumkin, tayyorgarlik ishlari ketmoqda”, — deydi Putinning matbuot kotibi Dmitriy Peskov.
“Vedomosti” nashri prezident ma’muriyatiga yaqin bo‘lgan uchta manbaga tayanib, Putin 27-noyabrda nishonlanadigan onalar kunida rus harbiylarning onalari bilan uchrashishini ma’lum qilgandi.
Noyabr oyi boshida Putin rossiyaliklar bilan uchrashib, safarbar qilinganlar haqida ularning fikrlarini eshitishga va’da bergan. Peskov keyinroq prezident fuqarolar bilan alohida tadbirda uchrashishi va bu haqda Kreml keyinroq ma’lum qilishini aytgandi.
21-sentyabr kuni Putin qisman safarbarlik e’lon qildi. 28-oktabr kuni mudofaa vaziri Sergey Shoygu uning yakunlangani haqida ma’lum qildi. Prezidentning so‘zlariga ko‘ra, noyabr oyi boshiga qadar mamlakatda 318 ming kishi, jumladan, ko‘ngillilar safarbar etilgan. Ulardan 49 ming nafari jangovar zonada bo‘lgan.
Izoh (0)