Кремль Россия президенти Владимир Путин ва қисман сафарбарликка чақирилганларнинг оилалари билан ушрашув ўтказишга тайёрланмоқда. Бу ҳақда «РИА Новости» хабар берди.
Маълум қилинишича, учрашувда ҳарбий хизматчиларнинг оналари ҳам иштирок этади.
«Бундай учрашув режалаштирилган, тасдиқлашимиз мумкин, тайёргарлик ишлари кетмоқда», — дейди Путиннинг матбуот котиби Дмитрий Песков.
«Ведомости» нашри президент маъмуриятига яқин бўлган учта манбага таяниб, Путин 27 ноябрда нишонланадиган оналар кунида рус ҳарбийларнинг оналари билан учрашишини маълум қилганди.
Ноябрь ойи бошида Путин россияликлар билан учрашиб, сафарбар қилинганлар ҳақида уларнинг фикрларини эшитишга ваъда берган. Песков кейинроқ президент фуқаролар билан алоҳида тадбирда учрашиши ва бу ҳақда Кремль кейинроқ маълум қилишини айтганди.
21-сентябр куни Путин қисман сафарбарлик эълон қилди. 28 октябрь куни мудофаа вазири Сергей Шойгу унинг якунлангани ҳақида маълум қилди. Президентнинг сўзларига кўра, ноябрь ойи бошига қадар мамлакатда 318 минг киши, жумладан, кўнгиллилар сафарбар этилган. Улардан 49 минг нафари жанговар зонада бўлган.
Изоҳ (0)