Rossiya samolyotlari va suvosti kemalari Shimoliy Amerika yaqinida patrullik qilmoqda

Rossiya Shimoliy Amerika davlatlari chegaralari yaqinida bahorda to‘xtatgan havo patrulligini qayta tikladi. Bu haqda Global News xabar berdi.

Ma’lum qilinishicha, Rossiya suvosti kemalari qit’a qirg‘oqlarida dengiz patrullarini o‘tkazmoqda. Shimoliy Amerika aerokosmik mudofaa qo‘mondonligi boshlig‘i o‘rinbosari, kanadalik general-leytenant Alen Pelletye bu bo‘yicha ma’lumot bergan.

“Bu yil AQSH va Kanada qirg‘oqlaridagi samolyotlar hamda suvosti kemalari soni qisqarganini ko‘rmoqdamiz. Biroq patrullik faoliyatining ba’zilari qayta tiklandi. Bu uzoq masofali aviatsiyadan foydalanish bilan cheklanmaydi. Rossiya hozirda Atlantika va Tinch okeani sohillarida suvosti kemalaridan o‘zining strategik imkoniyatlarini namoyish etish va Shimoliy Amerikaga xavf tug‘dirish uchun foydalanmoqda”, — dedi Pelletye.

Shu bilan birga, u Rossiya Arktika orqali mintaqaga uzoq masofali bombardimonchi samolyotlarni yuborayotganini aytdi. Kanadalik general Rossiyaning Shimoliy Amerika atrofidagi harakatlari haqida qo‘shimcha ma’lumot bermadi. Biroq oktabr oyida AQSH havo kuchlari Alyaska yaqinida Rossiyaning ikkita bombardimonchi samolyotini kuzatib borgani, ammo aviatexnika Amerika havo hududiga kirmaganini eslatdi.

Yanvar oyida Rossiya Arktikada keng ko‘lamli harbiy mashg‘ulotlarni boshlagandi. Mashg‘ulotlarda ishtirok etish uchun 1200 nafargacha shaxsiy tarkib, 140 ga yaqin harbiy va maxsus texnika, 20 tagacha uchuvchi apparat, 30 tagacha kema, suvosti kemalari va yordamchi kemalar jalb qilingandi.