Туркия Мудофаа вазирлигининг маълум қилишича, Ироқ ва Сурия шимолидаги курд жангарилари базаларига берилган авиазарбаларда 89 та нишон, жумладан, бошпана ва ўқ-дорилар омбори йўқ қилинди. Reuters маҳаллий манбага таяниб, Туркия ҳаво кучларининг Хасака вилоятига ҳужуми чоғида уч нафар суриялик ҳарбий ҳалок бўлганини хабар қилмоқда. Суриянинг SANA давлат агентлиги Алеппо ва Ҳасек вилоятларида бир неча аскар ҳалок бўлганини маълум қилди.
Туркия ҳужумлари Ироқнинг Қандил, Асос ва Хакурк ҳудудларига ҳамда Сурия шимолидаги Кобани, Тал-Рифат, Жизира ва Дерик шаҳарларига уюштирилган, деб ёзмоқда Reuters Туркия Мудофаа вазирлигига таяниб. Унда қайд этилишича, «зарарсизлантирилганлар орасида террор ташкилот етакчилари ҳам бор».
20 ноябрь куни эрталаб Анқара Ироқ ва Сурия шимолидаги курдлар томонидан назорат қилинадиган ҳудудларга зарба бергани, чунки бу ҳудудлардан «террорчилар Туркияга қарши ҳужумларда база сифатида фойдаланган»и ҳақида эълон қилганди.
Бу ҳаракатлар «Тирноқ-қилич» операцияси доирасида амалга оширилган, унда «Курдистон ишчилар партияси» (КИП), Курдистон жамоалари иттифоқи (КЖИ), курд халқининг ўзини ўзи мудофаа қилиш бўлинмаларини зарарсизлантириш мақсад қилинган.
Айни пайтда Туркия курдларга қарши ҳаво операцияси якунланганини маълум қилди. Операцияга 50 дан ортиқ самолёт ва 20 та дрон жалб қилинган.
Туркия КИПни Истанбулдаги терактни уюштирганликда айбламоқда, партия Анқарада террорчи ташкилот ҳисобланади. 13 ноябрь куни шаҳарнинг машҳур пиёдалар кўчаларидан бири – Истиқлолда портлаш содир бўлган эди, оқибатда олти киши ҳалок бўлди, камида 81 киши жароҳатланди.
Ҳужумда 1999 йилда туғилган Сурия фуқароси Аҳлам Альбашир гумон қилиниб, қўлга олинди. Туркия полициясига кўра, у КИП билан алоқаси борлигини тан олган. Портлаш билан боғлиқ ҳолда жами 50 киши ҳибсга олинган.
КИП ҳужумга алоқадорлигини рад этди. Ташкилот ўз баёнотида «курдлар тинч аҳолига ҳар қандай тарзда ҳужум қилиши мумкин эмаслигини» таъкидлаган.
Изоҳ (1)
Ух блаа юрагига коил коллим лекин