Ukraina raketasining Polshaga qulashi Yevropa havo hujumidan mudofaa tizimidagi kamchiliklarni ochib berdi, dedi Germaniya mudofaa vaziri Kristina Lambrext Rheinischen Post nashriga bergan intervyusida.
Lambrextning fikricha, NATO havo hujumidan mudofaa tizimini takomillashtirish kerak.
“Bu, ayniqsa, Rossiya va Ukraina bilan bevosita chegaradosh Polsha, Slovakiya va Boltiqbo‘yi davlatlari singari NATO ittifoqchilariga taalluqli”, — dedi Lambrext.
U shuningdek, Berlin Varshavaga osmonini himoya qilish uchun Eurofighter qiruvchi samolyotlari va Amerikaning Patriot havo mudofaa tizimlarini taklif qilganini aytdi. Ayni paytda Germaniya Slovakiyaga xuddi shunday yordam ko‘rsatmoqda. Tomonlar kelishuvni 2023-yil oxirigacha uzaytirish niyatida.
Polshaga tushgan raketalar tafsilotlari
15-noyabr kuni Rossiya Ukrainaning Kiyev shahri va bir qator viloyatlariga 80 dan ortiq raketa hujumi uyushtirdi. Holat yuzasidan Ukraina prezidenti Vladimir Zelenskiy aholiga boshpanalarda qolishni so‘radi. Shu kuni Polshaga ikkita raketa tushdi va hodisada ikki kishi halok bo‘ldi. Polsha bosh vaziri tunda Vazirlar Kengashining Milliy xavfsizlik va mudofaa qo‘mitasini chaqirdi. Havoga qiruvchi samolyotlar ko‘tarildi. Polsha prezidenti raketalarning Ukrainaga tegishli bo‘lishi mumkinligini aytdi. NATO bosh kotibi ham shunday fikr bildirdi, ammo bunda Kiyev emas, Rossiya javobgarligini ta’kidladi. Zelenskiy esa raketalar Ukrainaga emas, balki Rossiyaga tegishli ekanini e’lon qildi hamda Polshadan Kiyevning tergovga qo‘shilishini talab qildi. Germaniya va Britaniya raketalar Polshaga “Putin urushi” sabab tushganini ma’lum qildi.
O‘z navbatida, Oq uy bayonot bilan chiqib, tergov natijalaridan qat’iy nazar hodisada Rossiya javobgarligini e’lon qildi. Bayden esa Zelenskiyning Polshaga qulagan raketalar haqidagi bayonotida dalil yo‘qligini aytdi.
Izoh (0)