Rossiya va Xitoy AQSHni gipertovushli qurollar texnologiyasini rivojlantirishni jadallashtirishga majbur qilmoqda. Bu haqda AQSH harbiy-dengiz kuchlarining strategik tizimlar dasturi direktori, vitse-admiral Jonni Vulf ma’lum qildi, deb xabar beradi CNN.
“Yaqin vaqtgacha bizda qurol tizimida ushbu texnologiyani ishlab chiqish va joriy qilish uchun chinakam harakatlantiruvchi kuch yo‘q edi. Endi shunday zarurat paydo bo‘ldi va biz zudlik bilan unga yetib olish niyatidamiz”, — dedi u.
Uning so‘zlariga ko‘ra, Pentagon ushbu texnologiyani joriy etish bo‘yicha sinov va tadqiqotlar sur’atini oshirishga intilmoqda.
5-noyabr kuni AQSH harbiy-dengiz kuchlari admirali Charlz Richard gipertovushli qurollar poygasida Rossiya va Xitoy AQSHni chetlab o‘tganini tan olgandi.
AQSH o‘zining gipertovushli raketasini yaratmoqchiligi haqida 2020-yil may oyida o‘sha paytdagi davlat rahbari Donald Tramp e’lon qilgan edi. U AQSH harbiylari tomonidan ishlab chiqilayotgan raketa hozirda dunyodagi eng tez deb hisoblangan raketadan 17 baravar tezroq uchishi va 1,6 ming km masofadagi nishonlarni urib tushira olishini aytgandi.
Oktabr oyi oxirida AQSH harbiy-dengiz kuchlari gipertovushli raketaning tarkibiy qismlari muvaffaqiyatli sinovdan o‘tkazilgani haqida xabar berdi.
Izoh (0)