Qozog‘istonning “Bayterek” xoldingi rahbari Kanat Sharlapayev Rossiya fuqaroligidan chiqish haqida ariza berdi. U Vladimir Putinning tegishli farmoni bilan qanoatlantirildi, deb yozadi “Kommersant”.
“Bayterek” — Qozog‘iston hukumatining asosiy moliyaviy instituti. Xolding o‘z sho‘ba tashkilotlari orqali davlat va hukumat dasturlari hamda “100 ta muayyan qadam” milliy rejasini amalga oshirishda asosiy operator hisoblanadi.
Sharlapayev Rossiyada tug‘ilgan va avtomatik ravishda u yerning fuqaroligini olgan. “1981-yil 9-iyulda Saratov viloyatida tug‘ilgan Sharlapayev Kanat Bisimbayevich va uning 2017-yil 5-aprelda Moskvada tug‘ilgan qizi Sharlapayeva Dana Kanatkizining Rossiya fuqaroligidan chiqish haqidagi arizasi qanoatlantirilsin”, — deyiladi 18-noyabrgi farmon matnida. Unda fuqarolikdan voz kechish sabablari keltirilmagan.
Yana qaysi biznesmenlar Rossiya fuqaroligidan voz kechgan?
Noyabr boshida biznesmen Oleg Tinkov Rossiya pasportidan voz kechishi haqida ijtimoiy tarmoqlar orqali ma’lum qildi. O‘z xatti-harakatini u urushga qarshi ekanligi bilan izohladi. “Bunday pasportim bo‘lishidan uyalaman”, — deb yozdi u.31-oktabr kuni Revolut bank servisiga asos solgan biznesmen Nikolay Storonskiy Rossiya fuqaroligidan voz kechgani xabar berilgandi. The Telegraph yozishicha, Revolut vakillari Storonskiyning RF fuqaroligidan voz kechishi Ukrainadagi urush bilan bog‘liqligini bildirgan holda, biznesmen “qat’iyan jangovar harakatlarni zudlik bilan to‘xtatishga chaqirishi”ni ta’kidlagan.
Avvalroq tadbirkor va investor, DST Global investitsiyaviy fondi egasi milliarder Yuriy Milner Rossiya fuqaroligidan voz kechgani ma’lum bo‘lgandi.
Sentabr boshida rossiyalik va armanistonlik tadbirkor va investor Ruben Vardanyan Rossiya fuqaroligidan voz kechib, tan olinmagan Tog‘li Qorabog‘ Respublikasiga ko‘chib o‘tganini ma’lum qilgandi.
Shuningdek, iyun oyida Freedom Finance sarmoya kompaniyasi asoschisi Timur Turlov Rossiya fuqaroligidan voz kechib, Qozog‘iston pasportini olganini ma’lum qilgandi.
2022-yil aprelida Rossiyaga aloqador bo‘lgan bir qator tadbirkorlar Forbes jurnaliga murojaat qilib, ularni “rossiyalik biznesmenlar” deb atamaslikni so‘ragan. Ular orasida Nikolay Storonskiy va Yuriy Milner ham bo‘lgan.
Izoh (0)