Украина ракетасининг Польшага қулаши Европа ҳаво ҳужумидан мудофаа тизимидаги камчиликларни очиб берди, деди Германия мудофаа вазири Кристина Ламбрехт Рҳеинисчен Пост нашрига берган интервьюсида.
Ламбрехтнинг фикрича, НАТО ҳаво ҳужумидан мудофаа тизимини такомиллаштириш керак.
«Бу, айниқса, Россия ва Украина билан бевосита чегарадош Польша, Словакия ва Болтиқбўйи давлатлари сингари НАТО иттифоқчиларига тааллуқли», — деди Ламбрехт.
У шунингдек, Берлин Варшавага осмонини ҳимоя қилиш учун Eurofighter қирувчи самолётлари ва Американинг Патриот ҳаво мудофаа тизимларини таклиф қилганини айтди. Айни пайтда Германия Словакияга худди шундай ёрдам кўрсатмоқда. Томонлар келишувни 2023 йил охиригача узайтириш ниятида.
Польшага тушган ракеталар тафсилотлари
15 ноябрь куни Россия Украинанинг Киев шаҳри ва бир қатор вилоятларига 80 дан ортиқ ракета ҳужуми уюштирди. Ҳолат юзасидан Украина президенти Владимир Зеленский аҳолига бошпаналарда қолишни сўради. Шу куни Польшага иккита ракета тушди ва ҳодисада икки киши ҳалок бўлди. Польша бош вазири тунда Вазирлар Кенгашининг Миллий хавфсизлик ва мудофаа қўмитасини чақирди. Ҳавога қирувчи самолётлар кўтарилди. Польша президенти ракеталарнинг Украинага тегишли бўлиши мумкинлигини айтди. НАТО бош котиби ҳам шундай фикр билдирди, аммо бунда Киев эмас, Россия жавобгарлигини таъкидлади. Зеленский эса ракеталар Украинага эмас, балки Россияга тегишли эканини эълон қилди ҳамда Польшадан Киевнинг терговга қўшилишини талаб қилди. Германия ва Британия ракеталар Польшага «Путин уруши» сабаб тушганини маълум қилди.
Ўз навбатида, Оқ уй баёнот билан чиқиб, тергов натижаларидан қатъий назар ҳодисада Россия жавобгарлигини эълон қилди. Байден эса Зеленскийнинг Польшага қулаган ракеталар ҳақидаги баёнотида далил йўқлигини айтди.
Изоҳ (0)