“Yashnobod” innovatsion texnoparki rezidenti “Aql egalari” MCHJ Eronning Amnpardaz Soft Coperation kompaniyasiga AKT va blokcheyn xizmatlarini sotish bo‘yicha shartnoma imzoladi, deb xabar bermoqda “Dunyo” axborot agentligi.
Qayd etilishicha, yaqinda o‘tkazilgan “InnoWeek.uz-2022” Xalqaro innovatsion g‘oyalar haftaligi doirasida Eronning Amnpardaz Soft Coperation kompaniyasi va “Yashnobod” innovatsion texnoparki rezidenti “Aql egalari” MCHJ o‘rtasidagi 1,5 million dollarga teng investitsiyaviy kelishuv imzolangan.
Amnpardaz Soft Coperation kompaniyasi 2005-yildan beri Eronda veb-dasturiy ta’minotlar kiberxavfsizligi bo‘yicha ishlab kelayotgan, eng so‘nggi antivirus dasturiy tizimlariga ega mamlakatdagi yirik IT-xolding tuzilmasi hisoblanadi. 200 dan ortiq yetakchi dasturchilar guruhidan iborat kompaniyaning yillik mablag‘ aylanmasi 2 milliard dollarni tashkil etadi.
“Amnpardaz Soft Coperation kompaniyasi bilan imzolangan ushbu kelishuv yetakchi IT-mutaxassislarni birlashtirgan Farg‘ona selikon vodiysini tashkil etishga qaratilgan maqsadimiz yo‘lida birinchi qadam bo‘ldi. 2023-yil Farg‘ona viloyatining Oltiariq tumanida 100 nafar IT-mutaxassis yashashi va ishlashi uchun barcha imkoniyatlar yaratilgan 5 gektar maydonni egallagan innovatsion ekotizim yaratmoqchimiz”, — deydi MCHJ rahbari Alisher Abdumalikxon.
Izoh (0)