Surxondaryoda 428 mln so‘m kredit mablag‘ini talon-toroj qilgan rahbar ushlandi

Surxondaryo viloyati Boysun tumanida tikuvchilikni rivojlantirish va chorva mollarini yetkazib berish uchun ajratilgan kredit mablag‘larini o‘zlashtirish holatlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.

Qayd etilishicha, Bosh prokuratura huzuridagi departamentning Boysun tuman bo‘limi tomonidan tergovga qadar tekshiruv o‘tkazilgan. Unda “U.” kichik korxonasi rahbari N.A. hududiy tijorat banki filialidan tikuvchilikni rivojlantirish uchun tikuv mashinasi, asbob-uskuna va xomashyolar sotib olish uchun ajratilgan kredit mablag‘ini “B.T.” kichik korxonasiga o‘tkazish orqali boshqa maqsadlarda sarflab yuborgani aniqlangan. U jami 428,4 million so‘mni o‘zlashtirish yo‘li bilan talon-toroj qilgan.

Shuningdek, Boysun tuman bo‘limi tomonidan o‘tkazilgan yana bir tergovga qadar tekshiruvda fuqaro O‘.I. va “M.O‘.” fermer xo‘jaligi rahbari O‘.M. 6 nafar fuqaroning xabardorligisiz ta’minotchi korxonalar hisob raqamiga 174 million so‘m kredit mablag‘ini o‘tkazgani aniqlangan. Ular fuqarolarga chorva mollarni olib bermasdan, o‘zgalar mulkini firibgarlik yo‘li bilan qo‘lga kiritgan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.