Ўзбекистон компанияси Эронга АКТ ва блокчейн хизматларини сотиш бўйича шартнома имзолади

«Яшнобод» инновацион технопарки резиденти «Ақл эгалари» МЧЖ Эроннинг Amnpardaz Soft Coperation компаниясига АКТ ва блокчейн хизматларини сотиш бўйича шартнома имзолади, деб хабар бермоқда «Дунё» ахборот агентлиги.

Қайд этилишича, яқинда ўтказилган «InnoWeek.уз-2022» Халқаро инновацион ғоялар ҳафталиги доирасида Эроннинг Amnpardaz Soft Coperation компанияси ва «Яшнобод» инновацион технопарки резиденти «Ақл эгалари» МЧЖ ўртасидаги 1,5 миллион долларга тенг инвестициявий келишув имзоланган.

Amnpardaz Soft Coperation компанияси 2005 йилдан бери Эронда веб-дастурий таъминотлар киберхавфсизлиги бўйича ишлаб келаётган, энг сўнгги антивирус дастурий тизимларига эга мамлакатдаги йирик IT-холдинг тузилмаси ҳисобланади. 200 дан ортиқ етакчи дастурчилар гуруҳидан иборат компаниянинг йиллик маблағ айланмаси 2 миллиард долларни ташкил этади.

«Amnpardaz Soft Coperation компанияси билан имзоланган ушбу келишув етакчи IT-мутахассисларни бирлаштирган Фарғона селикон водийсини ташкил этишга қаратилган мақсадимиз йўлида биринчи қадам бўлди. 2023 йил Фарғона вилоятининг Олтиариқ туманида 100 нафар IT-мутахассис яшаши ва ишлаши учун барча имкониятлар яратилган 5 гектар майдонни эгаллаган инновацион экотизим яратмоқчимиз», — дейди МЧЖ раҳбари Алишер Абдумаликхон.