AQSH NATOning Yevropadagi bazalariga yangilangan B61-12 termoyadro bombalarini jo‘natish muddatini oldinga surdi. Bu haqda Politico xabar bermoqda.
AQSHning asosiy yadro quroli hisoblangan B61-12 bombalari dastlab Yevropaga 2023-yilning bahorida yuborilishi kutilgan edi, biroq keyinchalik yetkazib berish 2022-yilning dekabr oyiga ko‘chirildi. Nashrning yozishicha, bu haqda oktabr oyida Bryusselda bo‘lib o‘tgan NATOga a’zo 15 davlat mudofaa vazirlarining uchrashuvidan so‘ng Pentagon va Davlat departamenti xodimlariga yuborilgan telegrammada aytilgan.
Ushbu masala bilan tanish bo‘lgan ikki manba Politico nashriga bombalar Yevropaga tezlashtirilgan tarzda yuborilishini tasdiqladi.
Pentagon matbuot kotibi Patrik Rayderning nashrga aytishicha, B61 bombalarini modernizatsiya qilish uzoq yillardan beri davom etmoqda, Qo‘shma Shtatlar eski qurollarni bombalarning modernizatsiya qilingan versiyalari bilan almashtirishni anchadan beri rejalashtirgan. “Buni Ukrainadagi hozirgi voqealarga hech qanday aloqasi yo‘q, yetkazib berishning tezlashtirilishi urushga bog‘liq emas”, — dedi AQSH Mudofaa vazirligi vakili.
B61 — birinchi marta 1960-yillarda ishlab chiqilgan yadroviy bombalar oilasi. AQSH o‘nlab yillar davomida bombalarning 12 ta versiyasini ishlab chiqdi, ularning aksariyati hozirda eskirgan. AQSH Energetika vazirligi bombalarning eski versiyalarini, jumladan Germaniya, Italiya, Belgiya, Niderlandiya va Turkiyadagi aviabazalarda saqlanadigan 100 ga yaqin bombalarni almashtirish uchun 10 milliard dollarlik modernizatsiya dasturini rejalashtirmoqda.
B61 bombasining yangi versiyasi AQSH va ittifoqchilarining harbiy samolyotlari, jumladan B-2 va B-21 bombardimonchisi, shuningdek, F-15, F-16, F-35 va Tornado qiruvchisi bilan olib yurishga mo‘ljallab ishlab chiqilgan.
17—30-oktabr kunlari NATO harbiylari alyansning yadroviy kuchini sinovdan o‘tkazish bo‘yicha Steadfast Noon mashg‘ulotlarini o‘tkazmoqda. Mashqlarda 70 ga yaqin samolyot qatnashmoqda. 26-oktabr kuni Rossiya harbiylari ham o‘z mashg‘ulotlari davomida dushmanning yadro zarbasiga javoban yirik yadroviy zarba berish bo‘yicha o‘quv mashg‘ulotlarini o‘tkazdi. Unga Vladimir Putin rahbarlik qildi.
Izoh (0)