“Vagner” xususiy harbiy kompaniyasi Ukrainadagi urushga Afg‘oniston armiyasining elita maxsus bo‘linmalari vakillarini yollamoqda, ular amerikalik instruktorlar tomonidan o‘qitilgan va hokimiyat tepasiga “Tolibon” harakati kelganidan keyin ishsiz qolgan. Bu haqda Foreign Policy maxsus bo‘linmalar orasidagi manbalariga tayanib xabar berdi.
Ta’kidlanishicha, 2021-yil avgustida, toliblar Afg‘onistonda hokimiyatni egallab olgach, AQSH maxsus bo‘linmalardan bir necha yuz nafar katta ofitserlarni evakuatsiya qilgan, xolos, 20 dan 30 ming kishigacha bo‘lgan jangchilar esa taqdir ixtiyoriga tashlab qo‘yilgan. Ular qo‘shni mamlakatlarga qochishga yoki yashirinishga majbur bo‘lgan, chunki “Tolibon” AQSH va avvalgi afg‘on hukumati bilan hamkorlik qilgan harbiylar iziga tushib, ularni o‘ldirgan.
AQSH Kongressida Afg‘onistondan evakuatsiya chog‘ida yo‘l qo‘yilgan xatoliklarni muhokama qilish chog‘ida amerikaliklar tomonidan tashlab ketilgan afg‘on maxsus bo‘linmalari jangchilari “AQSH xavfsizligiga tahdid solishi mumkinligi”, chunki Vashingtonga dushman mamlakatlar tomonidan yollanishi mumkinligi haqida xavotirlar bildirilgan edi.
Foreign Policy manbalari hisob-kitoblariga ko‘ra, “Vagner” guruhiga 10 ming nafargacha afg‘on jangchilari qo‘shilishi mumkin, chunki ularning “yo‘qotadigan hech narsasi yo‘q”, shu bilan birga, ularning ko‘pchiligi toliblar rejimi bilan munosabatlarni yo‘lga qo‘yayotgan Rossiyani Afg‘onistonning dushmani deb hisoblaydi.
“Ular Pokiston yoki Eronda kuniga 3—4 dollar yo bo‘lmasa, Turkiyada kuniga 10 dollar evaziga ishlashga tayyor. Agar ‘Vagner’ yoki kim bo‘lsa ham, bu odamning oldiga kelib unga 1000 dollar taklif qilsa, u yana jang qilishdan bosh tortmaydi. Agar siz bir kishini yollasangiz, u eski bo‘linmasining yarmini o‘zi bilan olib keladi”, — dedi nashr manbalaridan biri.
Foreign Policy qayd etishicha, umuman olganda, Afg‘oniston xavfsizlik kuchlari AQSH ketganidan keyin tom ma’noda bir necha hafta ichida mamlakatni toliblarga berib qo‘yib, o‘z qobiliyatsizligini ko‘rsatgan bo‘lsa-da, maxsus bo‘linma jangchilari doim yaxshi professionallar hisoblangan, chunki ular Amerika va Britaniyaning elita bo‘linmalari instruktorlari tomonidan tayyorlangan. Nashr manbalaridan biri taxmin qilishicha, afg‘onlarning Ukrainadagi jang maydonida paydo bo‘lishi “o‘yin qoidalarini o‘zgartirishi” mumkin.
“Ulardan G‘arbdagi ittifoqdoshlar foydalangani, ular ukrainaliklar tomonida turib jang qilgani yaxshiroq edi. Ular ruslar uchun jang qilishni istamaydi, ruslar — dushmanlar. Lekin ular nima ham qila olardi?” — dedi nashrning yana bir suhbatdoshi.
Vagner guruhi o‘zi qanday guruh?
Vagner guruhi birinchi marta Ukrainada 2014-yilda paydo bo‘lgan va Rossiyaning Qrimni egallab olishida muhim rol o‘ynagan edi.Unga maxsus topshiriqli bo‘linma sobiq jangchisi Dmitriy Valeryevich Utkin asos solgan deb hisoblanadi, u guruhga Gitlerning sevimli kompozitori Richard Vagnerning nomini bergan.
Ko‘plab G‘arb OAVlari Vagner guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.
Izoh (0)