АҚШ янгиланган ядро бомбаларини Европага жўнатиш муддатини олдинга сурди. Улар декабрда келтирилади

АҚШ НАТОнинг Европадаги базаларига янгиланган B61-12 термоядро бомбаларини жўнатиш муддатини олдинга сурди. Бу ҳақда Politico хабар бермоқда.

АҚШнинг асосий ядро қуроли ҳисобланган B61-12 бомбалари дастлаб Европага 2023 йилнинг баҳорида юборилиши кутилган эди, бироқ кейинчалик етказиб бериш 2022 йилнинг декабрь ойига кўчирилди. Нашрнинг ёзишича, бу ҳақда октябрь ойида Брюсселда бўлиб ўтган НАТОга аъзо 15 давлат мудофаа вазирларининг учрашувидан сўнг Пентагон ва Давлат департаменти ходимларига юборилган телеграммада айтилган.

Ушбу масала билан таниш бўлган икки манба Politico нашрига бомбалар Европага тезлаштирилган тарзда юборилишини тасдиқлади.

Пентагон матбуот котиби Патрик Райдернинг нашрга айтишича, B61 бомбаларини модернизация қилиш узоқ йиллардан бери давом этмоқда, Қўшма Штатлар эски қуролларни бомбаларнинг модернизация қилинган версиялари билан алмаштиришни анчадан бери режалаштирган. «Буни Украинадаги ҳозирги воқеаларга ҳеч қандай алоқаси йўқ, етказиб беришнинг тезлаштирилиши урушга боғлиқ эмас», — деди АҚШ Мудофаа вазирлиги вакили.

B61 — биринчи марта 1960 йилларда ишлаб чиқилган ядровий бомбалар оиласи. АҚШ ўнлаб йиллар давомида бомбаларнинг 12 та версиясини ишлаб чиқди, уларнинг аксарияти ҳозирда эскирган. АҚШ Энергетика вазирлиги бомбаларнинг эски версияларини, жумладан Германия, Италия, Бельгия, Нидерландия ва Туркиядаги авиабазаларда сақланадиган 100 га яқин бомбаларни алмаштириш учун 10 миллиард долларлик модернизация дастурини режалаштирмоқда.

B61 бомбасининг янги версияси АҚШ ва иттифоқчиларининг ҳарбий самолётлари, жумладан Б-2 ва B-21 бомбардимончиси, шунингдек, F-15, F-16, F-35 ва Торнадо қирувчиси билан олиб юришга мўлжаллаб ишлаб чиқилган.

17—30 октябрь кунлари НАТО ҳарбийлари альянснинг ядровий кучини синовдан ўтказиш бўйича Steadfast Noon машғулотларини ўтказмоқда. Машқларда 70 га яқин самолёт қатнашмоқда. 26 октябрь куни Россия ҳарбийлари ҳам ўз машғулотлари давомида душманнинг ядро зарбасига жавобан йирик ядровий зарба бериш бўйича ўқув машғулотларини ўтказди. Унга Владимир Путин раҳбарлик қилди.