AQSH Markaziy razvedka boshqarmasi (MRB) direktori Uilyam Byorns oktabr boshida Ukrainaga kelib, prezident Vladimir Zelenskiy va bir qator ukrainalik mansabdorlar bilan uchrashgan. Bu haqda CNN AQSH ma’muriyati vakillariga tayanib xabar bermoqda.
Telekanal manbasiga ko‘ra, tashrif chog‘ida Byorns “AQSH Ukrainaga uning Rossiya tajovuziga qarshi kurashida ko‘mak berishga, shu jumladan, razvedka ma’lumotlari bilan uzluksiz ayirboshlashga sodiqligini tasdiqlagan”. Boshqa tafsilotlar keltirilmagan.
CNN qayd etishicha, safar Rossiya Ukrainada yadro quroli qo‘llashi mumkinligi borasidagi xavotirlar fonida amalga oshgan. Byorns va AQSH hukumatining boshqa vakillari Moskvaning bunday qadamga tayyorlanayotgani bo‘yicha dalillarni ko‘rmayotganini aytgan bo‘lsa-da, razvedka ma’lumotlaridan xabardor bo‘lgan manbalar voqealarning bunday tus olishi “xavfi yuqori” ekani haqida ogohlantirmoqda. “Rossiya tomonidan yadroviy zarba xavfi u Ukrainaga bostirib kirganidan buyon, ehtimol, eng yuqori darajaga yetdi”, — dedi ular.
Rossiya tomoni hech kimga yadro qurolidan foydalanish bilan tahdid qilmayotganini ko‘p bora ta’kidlagan. Politico ma’lumotlariga ko‘ra, G‘arb 21-sentabrdan keyin Rossiyaning yadroviy qurol-yarog‘lari ustidan kuzatuvni kuchaytirgan. O‘sha kuni qisman safarbarlik haqida e’lon qilayotib, prezident Vladimir Putin G‘arb “yadroviy shantaj”dan foydalanayotganini aytgan va Rossiyani himoya qilish uchun “barcha vositalar”ni ishga solishi haqida ogohlantirgandi.
Rossiya hukumati 23-oktabrdan buyon Ukraina “iflos bomba”dan foydalanib provokatsiyalar uyushtirishga va keuin bunda Rossiyani ayblashga tayyorlanayotganini da’vo qilmoqda.
CNN ma’lumotlariga ko‘ra, Byorns Ukrainaga yanvarda, Rossiya harbiy operatsiyasi boshlanishidan avval ham kelgan. 2021-yil noyabrida esa Moskvaga borib, Rossiya Xavfsizlik kengashi kotibi Nikolay Patrushev va Tashqi razvedka xizmati rahbari Sergey Narishkin bilan uchrashgan.
Izoh (0)