Rossiya huquq-tartibot organlari xodimlari jurnalist Kseniya Sobchakning Moskva viloyatidagi uyida tintuv o‘tkazmoqda. Bu haqda “TASS” va “112” Telegram-kanali xabar bergan.
“TASS” ma’lumotlariga ko‘ra, tintuv Sobchakning tijorat direktori Kirill Suxanovga nisbatan qo‘zg‘atilgan ta’magirlik haqidagi ish bo‘yicha o‘tkazilmoqda. Suxanov 25-oktabr kuni qo‘lga olingandi.
“Sobchakning o‘zida hech qanday protsessual maqom yo‘q”, — “TASS”ning huquq-tartibot organlaridagi manbasi.
Suxanov qo‘lga olingani haqida birinchi bo‘lib xabar bergan Varlamov News Telegram-kanali anonim manbaga tayanib, jinoyat ishi taxminan Sobchakning Telegram-kanallarida “negativning bloklanishi” bilan bog‘liqligini ma’lum qilgan. Boshqa manbalar buni tasdiqlamagan.
Sobchak Suxanovning ta’qib qilinishini “mamlakatga jurnalistikaga nisbatan navbatdagi bosim” deb atadi. “Ular doim mening jurnalistlarimni qo‘lga oladi. Endi esa Kirillga navbat yetdi va unga jinoyat ishi to‘qimoqda”, — dedi u.
Sobchak “Ostorojno, Media” (“Ehtiyot bo‘ling, matbuot”) loyihasini boshqaradi, u yangiliklar Telegram-kanallari va pabliklarini, podkastlar studiyasini, shuningdek, Sobchakning ijtimoiy tarmoqlarini o‘z ichiga oladi.
Sobchak — teleboshlovchi va siyosatchi, 2018-yilda u Rossiya prezidenti saylovida qatnashib, 1,68 foiz ovoz bilan to‘rtinchi o‘rinni egallagan. 2019-yildan buyon “Ehtiyot bo‘ling, Sobchak!” YouTube kanalini yuritib, yangiliklar sharhlari va taniqli shaxslar bilan intervyularni joylab boradi.
Izoh (0)