Demokratik partiyadan 30 nafar kongressmen AQSH prezidenti Jo Baydenga Rossiya bilan to‘g‘ridan to‘g‘ri muloqot boshlash haqidagi taklifdan iborat xatini qaytarib oldi, deb yozadi Meduza.
Maktub mualliflaridan biri Pramila Jayapal ma’lum qilishicha, u bir necha oy oldin yozilgan va tegishlicha tekshirilmasdan turib, xodimlar tomonidan e’lon qilingan.
Jayapalning so‘zlariga ko‘ra, respublikachilar saylovlarda g‘olib chiqqan taqdirda, Ukrainaga ko‘mak hajmi qisqartirilishi haqida yaqinda bergan bayonoti fonida ushbu xatning e’lon qilinishi bemavrid bo‘lgan. Demokratlar “ukrain xalqiga berilayotgan har bitta yordam paketini qat’iy va bir ovozdan qo‘llab-quvvatlaydi”, maktubdan esa buning aksi tushunilishi mumkin, dedi u.
Xatda Ukrainaga misli ko‘rilmagan harbiy va moliyaviy yordam ko‘rsatayotgan Bayden “o‘t ochishni to‘xtatishga real asos” topish uchun Rossiya bilan bevosita muzokaralarni ham boshlashi kerakligi aytilgandi. Ularning ta’kidlashicha, diplomatik yechimdan boshqasi “halokatli va aqlbovar qilmaydigan xavflar” bilan “uzoqqa cho‘zilgan urush”ni anglatadi.
Oq uy AQSH Davlat departamenti kongressmenlarning murojaatiga izoh berar ekan, Jo Bayden hali Rossiya bilan to‘g‘ridan to‘g‘ri muzokaralar o‘tkazish g‘oyasini qo‘llab-quvvatlamayotganini ma’lum qildi.
Izoh (0)