Buyuk Britaniyaning yangi bosh vaziri Rishi Sunak Ukraina prezidenti Vladimir Zelenskiy bilan telefon orqali muloqot qilib, London Ukrainani so‘zsiz qo‘llab-quvvatlashini tasdiqladi. Tomonlar Rossiyaga bosimni davom ettirishga kelishib oldi. Bu haqda Britaniya bosh vaziri kanselyariyasi xabarida aytilgan.
Sunakning so‘zlariga ko‘ra, uning bosh vazirligi davrida Buyuk Britaniyaning Ukrainani qo‘llab-quvvatlashi “har qachongidan ham kuchliroq bo‘ladi, prezident Zelenskiy esa Sunak hukumatining doimiy birdamligiga ishonishi mumkin”.
“Bosh vazir, shuningdek, MAGATEning Ukrainadagi yadro xavfsizligi va har qanday dezinformatsiyaga nisbatan shaffoflikni ta’minlash bo‘yicha olib borayotgan ishining muhimligini ta’kidladi. Har ikki yetakchi iqtisodiy sanksiyalarni davom ettirish orqali Rossiya prezidenti Vladimir Putinning varvarcha rejimiga bosim o‘tkazishni davom ettirish zarurligi to‘g‘risida kelishib oldi”, — deyiladi xabarda.
Bayonotda ta’kidlanishicha, Sunak Zelenskiy bilan “tez orada yuzma-yuz ko‘rishish” umidida ekanini bildirgan.
Kecha, 25-oktabr kuni Rishi Sunak rasman Britaniyaning 57-bosh vaziri etib tayinlandi. Sunak ushbu lavozimdagi ilk chiqishida Ukrainadagi urush haqida gapirdi.
O‘z nutqida u Rossiyani koronavirus pandemiyasining iqtisodiy oqibatlari fonida butun dunyo bo‘ylab energiya bozorlari va ta’minot zanjirlarini beqarorlashtirganlikda aybladi.
Izoh (0)