Eronning “Istiqlol” klubida to‘p surayotgan o‘zbekistonlik futbolchi Jaloliddin Masharipov jiddiy jarohat oldi. Jurnalist Aleksandr Troitskiyning xabar berishicha, futbolchining tizzasidagi paylardan biri uzilib ketgan. Shu sababli u yil oxirigacha maydonga tusha olmasligi mumkin.

Manbalarga ko‘ra, Masharipov bu jarohatni Turkiyada o‘tgan mavsumoldi yig‘inida olgan. Biroq unga noto‘g‘ri tashxis qo‘yilgan, shuning uchun futbolchi og‘riqqa qaramay mashg‘ulotlarni davom ettirgan. Tehronga qaytgach, holat yanada og‘irlashgan.
Futbolchining o‘ziga atigi 10 kunlik tiklanish kerakligi aytilgan bo‘lsa-da, aslida jarohat ancha jiddiy bo‘lib chiqqan. Bu esa “Istiqlol” klubi bosh murabbiyi Rikardo Sapintoni jahlini chiqargan. U klub shifokorlariga norozi ekanligini bildirgan.
Ma’lumotlarga ko‘ra, Masharipov yil oxirigacha qaydnomadan chiqariladi. Sababi uning to‘liq tiklanishi uchun uzoq vaqt talab etiladi. Bu degani, Masharipov katta ehtimol bilan 28-avgustdan 8-sentyabrga qadar O‘zbekiston va Tojikiston maydonlarida bo‘lib o‘tadigan CAFA Nations Cup-2025 musobaqasini o‘tkazib yuboradi.
Eslatib o‘tamiz, avvalroq “Istiqlol” safidagi yana bir o‘zbekistonlik futbolchi Rustam Ashurmatov ham jarohat sabab uzoq vaqtga safdan chiqqani haqida xabar berilgan edi.
Izoh (0)