Ukraina xavfsizlik xizmati xodimlari mamlakatning eng yirik “Motor Sich” aviakompaniyasi sobiq rahbari — 83 yoshli Vyacheslav Boguslayevni hibsga oldi.
22-oktabr kuni kechqurun tadbirkorning Zaporojye shahridagi uyida tintuv o‘tkazilgan, so‘ng u qo‘lga olingan, deb xabar berdi mahalliy “Zabor” nashri. Nashrga ko‘ra, UXX Boguslayevni Kiyevga jo‘natishga qaror qilgan.
“Gromadskye” telekanali manbasiga tayanib xabar berishicha, Boguslayev “kollaboratsiya faoliyati” va “bosqinchi davlat bilan sheriklik” moddalari bo‘yicha gumonlanuvchi sifatida hibsga olingan. “Strana.ua” manbasining ma’lum qilishicha, Boguslayevdan tashqari, “Motor Sich” bo‘limlaridan birining rahbari ham hibsga olingan.
UXX “Motor Sich” prezidenti va ushbu korxonaning tashqi iqtisodiy faoliyat bo‘limi boshlig‘ini qo‘lga olgani haqida rasman e’lon qildi. Idora hibsga olinganlarning ism-sharifini oshkor qilmagan bo‘lsa-da, Boguslayev 2013-yildan beri “Motor Sich”ning faxriy prezidenti ekani barchaga ma’lum.
UXX ma’lumotlariga ko‘ra, qo‘lga olinganlar “Motor Sich” korxonasi Rossiyaning hujumchi aviatsiyasi uchun harbiy tovarlarni noqonuniy yetkazib berganlikda gumon qilinmoqda (ular qachon yetkazib berilgani aytilmagan).
Gap Rossiyaning Mi-8AMTSH-VN, Ka-52 va Mi-28N rusumli hujumchi vertolyotlarini ishlab chiqarish va ta’mirlashda foydalanilgan ukrain aviadvigatellarining ulgurji partiyalarini yetkazib berish haqida bormoqda. “Bosqinchilar Ukrainaga to‘liq miqyosda bostirib kirish uchun armiya aviatsiyasining tegishli modellaridan ommaviy ravishda foydalangan”, — deyiladi UXX xabarida.
Vyacheslav Boguslayev “Motor Sich”ga 1990-yillarning boshidan beri rahbarlik qilib keladi. 2012-yilda u Oliy Rada deputati bo‘lgani uchun kompaniyadagi lavozimini tark etgan. Boguslayev Ukrainaning 100 nafar eng badavlat tadbirkorlari ro‘yxatiga kiritilgan: 2021-yilda u 125 million dollar boyligi bilan Forbes ro‘yxatida 62-o‘rinni egallagan. Boguslayev — Ukraina Qahramoni, u 2000-yilda ushbu unvonga sazovor bo‘lgan.
Izoh (0)