Kiyevga qurol yetkazib berish orqali NATO Rossiya bilan to‘g‘ridan to‘g‘ri xavfli harbiy to‘qnashuv chizig‘iga yaqinlashmoqda. Bu haqda Rossiya tashqi ishlar vazirligining qurol tarqatmaslik va ularni nazorat qilish ishlari bo‘yicha departamenti direktori o‘rinbosari Konstantin Vorontsov aytib o‘tdi, deb xabar bermoqda “RIA Novosti”.

Uning so‘zlariga ko‘ra, alyansga a’zo davlatlar Ukraina inqirozidagi ishtiroki haqida sukut saqlashni afzal ko‘rmoqda.“Ammo, haqiqatni yashirib bo‘lmaydi: go‘yo bir-biri bilan raqobatlashgandek, ular Kiyev rejimiga qurol va o‘q-dorilar yetkazishda, uni razvedka ma’lumotlari bilan ta’minlashda, askarlarini o‘qitishda, jangovar harakatlarga yo‘nalish berishda va shu tariqa Rossiya bilan to‘g‘ridan to‘g‘ri xavfli harbiy to‘qnashuv chizig‘iga yaqinlashishda davom etmoqda”, — dedi Vorontsov.

Kil Jahon Iqtisodiyoti Institutining o‘tgan hafta e’lon qilingan ma’lumotlariga ko‘ra, G‘arbning Ukrainaga umumiy harbiy yordami allaqachon 42,3 milliard dollarni tashkil etgan. Ularning yarmidan ko‘pi AQSH ulushiga to‘g‘ri keladi, deb ta’kidladi diplomat.

Vorontsovning so‘zlariga ko‘ra, Yevropa Ittifoqi va NATO mamlakatlari tomonidan Ukrainaga qurol-yarog‘ yetkazib berilishi ularni “Rossiyaga qarshi tajovuzga, shuningdek, Kiyev rejimi sakkiz yildan beri tinch aholiga qarshi sodir etib kelayotgan harbiy jinoyatlar va terrorchilik harakatlariga sherik bo‘lishiga olib keladi”.

“Bularga aloqador barcha albatta javobgarlikka tortiladi va jazolanadi”, — deya ishonch bildirdi u.