Agar Rossiya Kiyevdagi “qaror qabul qilish markazi” ya’ni Ukraina prezidentining ofisi joylashgan Bankova ko‘chasiga zarba bersa, dunyo Kremlga javob qaytarishga majbur bo‘ladi. Bu haqda Ukraina prezidenti Vladimir Zelenskiy Kanadaning CTV va CBC telekanallariga bergan intervyusida aytib o‘tdi.
“Agar qaror qabul qilish markaziga zarba berilishi haqida xabar paydo bo‘lsa, dunyoning javobi quyidagicha bo‘lishi kerak: Bankovaga zarba bersang, u holda, o‘zing turgan joyga ham zarba beriladi. Buni amalga oshiradigan bo‘lsang, bilib qo‘y, zarbang oqibatlaridan qat’i nazar, bir soniya ham o‘tmay sendagi qaror qabul qilish markazi zarbalarga uchraydi”, — dedi Ukraina rahbari.
Bu masalada Ukrainaning NATO davlati ekani yo emasligi ahamiyatsiz, deya qo‘shimcha qildi Zelenskiy.
Rossiya Ukrainaning muhim infratuzilmasiga hujum qilishni to‘xtatmayapti. Xususan, 19-oktabr, chorshanba kuni ular Ivano-Frankovsk viloyatidagi Burshtin issiqlik elektr stansiyasiga raketa hujumlarini uyushtirgan. Zelenskiy rus qo‘shinlarining muhim obyektlarga zarbalarini “terrorchilarga xos taktika” deb ta’riflagan.
Izoh (0)