Украинанинг энг йирик авиакомпанияси «Мотор Сич» собиқ раҳбари ҳибсга олинди. У Россия фойдасига ишлаганликда айбланмоқда

Украина хавфсизлик хизмати ходимлари мамлакатнинг энг йирик «Мотор Сич» авиакомпанияси собиқ раҳбари — 83 ёшли Вячеслав Богуслаевни ҳибсга олди.

22 октябрь куни кечқурун тадбиркорнинг Запорожье шаҳридаги уйида тинтув ўтказилган, сўнг у қўлга олинган, деб хабар берди маҳаллий «Забор» нашри. Нашрга кўра, УХХ Богуслаевни Киевга жўнатишга қарор қилган.

«Громадске» телеканали манбасига таяниб хабар беришича, Богуслаев «коллаборация фаолияти» ва «босқинчи давлат билан шериклик» моддалари бўйича гумонланувчи сифатида ҳибсга олинган. «Strana.ua» манбасининг маълум қилишича, Богуслаевдан ташқари, «Мотор Сич» бўлимларидан бирининг раҳбари ҳам ҳибсга олинган.

УХХ «Мотор Сич» президенти ва ушбу корхонанинг ташқи иқтисодий фаолият бўлими бошлиғини қўлга олгани ҳақида расман эълон қилди. Идора ҳибсга олинганларнинг исм-шарифини ошкор қилмаган бўлса-да, Богуслаев 2013 йилдан бери «Мотор Сич»нинг фахрий президенти экани барчага маълум.

УХХ маълумотларига кўра, қўлга олинганлар «Мотор Сич» корхонаси Россиянинг ҳужумчи авиацияси учун ҳарбий товарларни ноқонуний етказиб берганликда гумон қилинмоқда (улар қачон етказиб берилгани айтилмаган).

Гап Россиянинг Ми-8АМЦҲ-ВН, Ка-52 ва Ми-28Н русумли ҳужумчи вертолётларини ишлаб чиқариш ва таъмирлашда фойдаланилган украин авиадвигателларининг улгуржи партияларини етказиб бериш ҳақида бормоқда. «Босқинчилар Украинага тўлиқ миқёсда бостириб кириш учун армия авиациясининг тегишли моделларидан оммавий равишда фойдаланган», — дейилади УХХ хабарида.

Вячеслав Богуслаев «Мотор Сич»га 1990 йилларнинг бошидан бери раҳбарлик қилиб келади. 2012 йилда у Олий Рада депутати бўлгани учун компаниядаги лавозимини тарк этган. Богуслаев Украинанинг 100 нафар энг бадавлат тадбиркорлари рўйхатига киритилган: 2021 йилда у 125 миллион доллар бойлиги билан Forbes рўйхатида 62-ўринни эгаллаган. Богуслаев — Украина Қаҳрамони, у 2000 йилда ушбу унвонга сазовор бўлган.