Ayni paytda 50 dan ortiq xalqaro kompaniyalar o‘z bazalarini Rossiyadan Qozog‘istonga ko‘chirib o‘tkazgan. Bu haqda Qozog‘iston prezidenti Qosim-Jo‘mart To‘qayev Almati viloyatida jamoatchilik bilan uchrashuv chog‘ida ma’lum qildi, deb yozadi Asia Plus.
“Ularning barchasini yirik shaharlarga to‘plash mahsuldor bo‘lmaydi. Hokimiyat bunday ishlab chiqarish obyektlarini Almati yaqiniga katta avtomobil halqa yo‘li bo‘ylab joylashtirish masalasini o‘rganib chiqishi kerak, bu viloyat iqtisodiyotiga sezilarli darajada yordam beradi”, — dedi To‘qayev.
Bosh vazir Alixan Smailov 19-oktabr kuni Qozog‘iston parlamenti quyi palatasi yig‘ilishida dunyo kompaniyalarining 300 tasi o‘z ofislari va korxonalarini Rossiyadan Qozog‘istonga ko‘chirib o‘tkazishga tayyorligini ma’lum qildi.
Uning so‘zlariga ko‘ra, hukumat ko‘chirish masalasini batafsil ko‘rib chiqish uchun yirik firmalar ro‘yxatini tuzgan.
“Bugungi kunda 56 ta kompaniya bizning mamlakatimizda ishlashga tayyor. Ular bilan relokatsiya qilish bo‘yicha shartlar, vaqt va joy borasida mavzuli ishlar olib borilmoqda”, — dedi bosh vazir.
Uning ma’lumotlariga ko‘ra, bir nechta kompaniyalar allaqachon Qozog‘istonga ko‘chib kelgan. Ular orasida Honeywell, inDriver, Fortescue, Marubeni va boshqalar bor.
Rossiya-Ukraina nizosi boshlanganidan buyon mingdan ortiq chet el kompaniyalari Rossiyani tark etdi. Masalan, Starbucks va McDonald’s franshizalarini rossiyalik biznesmenlar sotib olib, ularning nomlarini o‘zgartirdi.
Qozog‘iston prezidenti To‘qayev Rossiya bozoridan ketgan xorijiy kompaniyalar Qozog‘istonga relokatsiya qilishi uchun qulay sharoitlar yaratishni hukumat zimmasiga yukladi.
Izoh (0)