Qozog‘iston TIV To‘qayevning “Tinchlikparvar” sayti ro‘yxatiga kiritilganiga munosabat bildirdi

Qozog‘iston prezidenti Qosim-Jo‘mart To‘qayevning Ukraina dushmanlari deb hisoblangan kishilar shaxsiy ma’lumotlari chop etiladigan “Tinchlikparvar” veb-sayti ro‘yxatiga kiritilgani Kiyevning rasmiy pozitsiyasini aks ettirmaydi. Bu haqda Qozog‘iston bosh vaziri o‘rinbosari va tashqi ishlar vaziri Muxtor Tlovberdi matbuot anjumanida ma’lum qildi.

Ukrainaning “Tinchlikparvar” veb-sayti 2014-yilda yaratilgan.

Keling, ‘Tinchlikparvar’ markazi o‘zi nima ekaniga to‘xtalib o‘tamiz. Veb-saytning o‘zida ta’kidlanganidek, bu jurnalistlar, ekspertlar va boshqalar tomonidan yaratilgan nodavlat tashkilotdir. U nodavlat tuzilma bo‘lgani uchun, tabiiyki, Ukraina hukumatining rasmiy pozitsiyasini aks ettirmaydi, — dedi  Qozog‘iston TIV vaziri.

Vazirning qayd etishicha, ro‘yxatga tushish To‘qayevni hech qanday tarzda obro‘sizlantirmaydi.

Bu davlat resursi emas. Hech qanday tahdid yo‘q, aks holda bu mavzu, jumladan, maxsus xizmatlar tomonidan muhokama qilinar edi. ‘Tinchlikparvar’ veb-saytining prezident bayonotiga havolasida men sof siyosiy narsani ko‘rmayapman”, — deya qo‘shimcha qildi TIV rahbari.

19-oktabr kuni To‘qayev “Rossiyaning 2014-yilda Ukrainaga qilgan tajovuzini jamoatchilik oldida inkor etgani” uchun “Tinchlikparvar” veb-sayti ma’lumotlar bazasiga kiritilgani haqida xabar berildi. Veb-saytda To‘qayevning Deutsche Welle bilan 2019-yildagi intervyusidan iqtibos keltirgan. Unda davlat rahbari Qozog‘iston “Qrimda sodir bo‘lgan voqealarni anneksiya deb atamasligini” aytgan. Shuningdek, u “Rossiya rahbariyatining dono va vijdonli ekaniga ishonishini” ta’kidlagan.

Shu bilan birga, iyun oyida To‘qayev Qozog‘iston DXR va LXR “kvazidavlat hududlarini” tan olmasligini aytgan edi. Ukraina prezidenti Vladimir Zelenskiy bilan iyul oyida bo‘lib o‘tgan suhbatda u Qozog‘istonning mojaroni diplomatik yo‘l bilan hal qilish bo‘yicha pozitsiyasini tasdiqlagan.

“Tinchlikparvar” ma’lumotlar bazasiga ko‘plab siyosatchilar (jumladan, davlat rahbarlari), jurnalistlar va jamoat arboblari kiritilgan. May oyi boshida saytda Vengriya bosh vaziri Viktor Orbanning ma’lumotlari aks etgan karta paydo bo‘ldi, baza yaratuvchilari uni “Ukrainaga qarshi targ‘ibotchi” va “Rossiya jinoyatlariga sherik” deb atagan.