Turkmaniston poytaxti Ashxobodda 17-oktabrdan buyon “Toshkent” bog‘i ochilishiga tayyorgarlik ishlari olib borilmoqda, hatto bog‘ atrofidagi ko‘chalar yopib qo‘yilmoqda, deb xabar beradi “Xronika Turkmenistana”.
“Toshkent” bog‘i O‘zbekiston prezidenti Shavkat Mirziyoyevning Turkmanistonga tashrifi chog‘ida tantanali ravishda ochilishi kutilmoqda.
Shavkat Mirziyoyev Turkmaniston prezidenti Serdar Berdimuhamedovning taklifiga binoan 20—21-oktabr kunlari rasmiy tashrif bilan ushbu mamlakatda bo‘ladi.
Nashr eslatishicha, “Toshkent” bog‘i iyun oyidayoq ochilishga tayyor bo‘lgan. U Turkmanistonning sobiq prezidenti Gurbanguli Berdimuhamedovning tavallud topgan kuni (29-iyun) ochilishi rejalashtirilgan, Shavkat Mirziyoyev uni tabriklash uchun Ashxobodga kelishi kutilgan edi.
Biroq O‘zbekiston prezidenti telefon orqali qutlov yo‘llagan, bog‘ning ochilishi esa keyingi tashrifga qoldirilgan.
“Toshkent” bog‘i qurilishi qachon boshlangan?
Gurbanguli Berdimuhamedov O‘zbekiston tashqi ishlar vaziri Abdulaziz Komilovning 2021-yil 17-fevral kuni Turkmanistonga tashrifi chog‘ida unga Ashxobod shahrida Toshkent bog‘i qurilishi haqida ma’lum qilgandi. Ertasi kuni “Neytral Turkmaniston” gazetasi bog‘ni loyihalash va qurish bo‘yicha tender e’lon qildi. Buyurtmachi Ashxobod shahri hokimligi edi.2021-yilning 17-mart kuni Toshkent shahar hokimi Jahongir Ortiqxo‘jayev boshchiligidagi delegatsiya amaliy tashrif bilan Ashxobodda bo‘ldi va Ashxobod hokimi bilan uchrashuvda “Toshkent bog‘i”ning dastlabki loyihasi bilan tanishdi.
2017-yil oktabr oyida Toshkentda Ashxobod bog‘i ochilgan edi, unda favvora, sakkiz qirrali yulduz ko‘rinishidagi gulzorlar, shuningdek, arxitekturasi Ashxoboddagi xalqaro aeroportga taqlid qiluvchi amfiteatr barpo qilingan.
Izoh (0)