22 ta mamlakat Eronda ishlab chiqarilgan jangovar uchar qurilmalarni sotib olish uchun rasmiy talabnomalar bergan. Bu haqda Eron oliy rahnamosi oyatulloh Xomeyniyning bosh harbiy yordamchisi va Islom inqilobi posbonlari korpusi sobiq qo‘mondoni general-mayor Yahyo Rahim Safaviy ma’lum qildi, deb yozadi EADaily.

“Eron uchuvchisiz uchar qurilmalarni sotib olish uchun da’vogar mamlakatlar hozircha Armaniston, Tojikiston, Serbiya, Jazoir, Venesuela va boshqalar”, — dedi Safaviy.

Uning qo‘shimcha qilishicha, 1979-yilgi Islom inqilobigacha Eron o‘z harbiy ehtiyojlarining 80 foizini xorijdan, birinchi navbatda, AQSH va boshqa G‘arb mamlakatlaridan import qilgan, ammo endi Islom respublikasi hamma narsani o‘zi ishlab chiqarmoqda.

Tojikistonning tegishli tuzilmalari ushbu ma’lumotni tasdiqlaganicha yo‘q.

Joriy yil mayida Eronning IRNA axborot agentligi Tojikistonda Eronning Ababil-2 uchuvchisiz uchar qurilmalarini ishlab chiqarish bo‘yicha korxona ochilganini ma’lum qilgandi. O‘shanda ochilishda Tojikiston mudofaa vaziri Sherali Mirzo va Eron Qurolli kuchlari Bosh shtabi boshlig‘i Muhammad Bokiriy qatnashgani xabar berilgandi.

Ammo Tojikiston tomoni bu haqda rasmiy ma’lumot e’lon qilmagan.

Eron uchuvchisiz uchar qurilmalarni ishlab chiqarishni 1980-yillarda boshlagan. Eron uchar qurilmalari rivojlanishini Amerika dronlari boshlab bergan, ular 1970-yillarda qabul qilib olingan Firebee havo nishonlari bo‘lgan.

Avvalroq Qirg‘iziston Turkiyaning Akıncı modelidagi Bayraktar tezkor-taktik o‘rta balandlikka parvoz qiluvchi uchuvchisiz uchar qurilmasini o‘z arsenaliga qabul qilib olgan edi.

Ijtimoiy tarmoqlarda tarqalgan xabarlarga ko‘ra, Turkiyada ishlab chiqarilgan zarbdor dronlar sentabr o‘rtalarida Tojikiston bilan chegarada yuzaga kelgan so‘nggi ziddiyatda qirg‘iz qo‘shinlari tomonidan qo‘llanilgan.