Sirdaryo viloyatining Yangiyer shahrida jamiyatda yurish-turish qoidalarini qo‘pol ravishda buzib, haqoratli so‘zlar aytib, videorolik olgan va buni ijtimoiy tarmoqlarda tarqatgan fuqarolar qamaldi. Bu haqda “Daryo”ga viloyat IIB axborot xizmati rahbari Doston Shamsiddinov xabar berdi.
Ma’lum qilinishicha, viloyatning Yangiyer shahrida yashovchi ikki nafar shaxs jamiyatda yurish-turish qoidalarini qo‘pol ravishda buzgan. Shuningdek, IIB xodimlarining qonuniy topshirig‘iga bo‘ysunmagan.
Ikki nafar shaxs jamiyatda yurish-turish qoidalarini qasddan mensimasdan, shuningdek qo‘pol va uyatli so‘zlar aytib, videoroliklar olishgan. Hamda buni ijtimoiy tarmoqlarda tarqatishgan. Viloyat IIB xodimlari huquqbuzarlarga o‘z vaqtida murojaat qilib, ularni tartibga chaqirishga uringan. Ammo ular Yangiyer shahar IIB xodimlarining qonuniy talabi — shahar IIBga kelish haqidagi so‘roviga uzrli sabablarsiz bo‘ysunmasdan harakatlarida davom etgan. Shu sabab ularga nisbatan Ma’muriy javobgarlik to‘g‘risidagi kodeksga ko‘ra, tegishli hujjatlar rasmiylashtirilib, Jinoyat ishlari bo‘yicha Yangiyer shahar sudiga yuborildi, — deydi Doston Shamsiddinov.Mazkur ishni ko‘rib chiqqan Jinoyat ishlari bo‘yicha Yangiyer shahar sudi ikki nafar fuqaroga 10 sutkaga ma’muriy qamoq jazosini tayinlagan.
Izoh (0)