Сирдарё вилоятининг Янгиер шаҳрида жамиятда юриш-туриш қоидаларини қўпол равишда бузиб, ҳақоратли сўзлар айтиб, видеоролик олган ва буни ижтимоий тармоқларда тарқатган фуқаролар қамалди. Бу ҳақда «Дарё»га вилоят ИИБ ахборот хизмати раҳбари Достон Шамсиддинов хабар берди.
Маълум қилинишича, вилоятнинг Янгиер шаҳрида яшовчи икки нафар шахс жамиятда юриш-туриш қоидаларини қўпол равишда бузган. Шунингдек, ИИБ ходимларининг қонуний топшириғига бўйсунмаган.
Икки нафар шахс жамиятда юриш-туриш қоидаларини қасддан менсимасдан, шунингдек қўпол ва уятли сўзлар айтиб, видеороликлар олишган. Ҳамда буни ижтимоий тармоқларда тарқатишган. Вилоят ИИБ ходимлари ҳуқуқбузарларга ўз вақтида мурожаат қилиб, уларни тартибга чақиришга уринган. Аммо улар Янгиер шаҳар ИИБ ходимларининг қонуний талаби — шаҳар ИИБга келиш ҳақидаги сўровига узрли сабабларсиз бўйсунмасдан ҳаракатларида давом этган. Шу сабаб уларга нисбатан Маъмурий жавобгарлик тўғрисидаги кодексга кўра, тегишли ҳужжатлар расмийлаштирилиб, Жиноят ишлари бўйича Янгиер шаҳар судига юборилди, — дейди Достон Шамсиддинов.Мазкур ишни кўриб чиққан Жиноят ишлари бўйича Янгиер шаҳар суди икки нафар фуқарога 10 суткага маъмурий қамоқ жазосини тайинлаган.
Изоҳ (0)