AQSH BMT Xavfsizlik kengashidan Ukrainaning bosib olingan hududlarida bo‘lib o‘tgan “referendumlar”ni tan olmaslikni talab qilmoqda.
AQSHning BMTdagi vakili Linda Tomas-Grinfild ma’lum qilishicha, mamlakat Albaniya bilan birgalikda ilgari surgan rezolyutsiyada quyidagilarga da’vat etiladi:
- Rossiyaning qalbaki “referendumlari”ni qoralash;
- Ukraina maqomi bilan bog‘liq hech qanday o‘zgarishlarni tan olmaslik;
- Rossiyaga Ukraina hududidan o‘z qo‘shinlarini olib ketish majburiyatini yuklash.
Referendumlar yakunlandi
Rossiya tarkibiga kirish haqidagi referendumlarda ovoz berish 27-sentabr kuni yakunlandi. Kechki vaqtga kelib, to‘rtta hududda ham byulletenlarning 100 foizi ko‘rib chiqildi. Natijalarga ko‘ra, LXR, DXR va Zaporojye viloyatida ovoz berganlarning 90 foizi, Xerson viloyatida esa 87 foizi Rossiyaga qo‘shilishni qo‘llab-quvvatladi.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
Rossiya Federatsiya kengashi raisi Valentina Matviyenko yuqori palata tomonidan yangi hududlarning Rossiya tarkibiga kirishi haqidagi qonunlar ko‘rib chiqiladigan majlis 4-oktabrda o‘tkazilishi mumkinligini aytgandi. Shu bilan birga, u rejadan tashqari yig‘ilishlar o‘tkazish zarurati yo‘qligini ta’kidladi.
Agar to‘rtta hudud aholisi Rossiya tarkibiga kirish istagini bildirsa, bu xohish qo‘llab-quvvatlanishini qayd etgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Izoh (0)