Qisman tan olingan Abxaziya respublikasi hukumati fuqarolarni Rossiyaning Ukrainadagi maxsus operatsiyaga jo‘natish uchun safarbar qilmayapti, ammo ko‘ngillilar bor. Bu haqda respublika tashqi ishlar vazirligi rahbari Inal Ardzinba ma’lum qildi.
“Bizda safarbarlik yo‘q. 2014-yildan beri abxaziyalik ko‘ngillilar qo‘liga qurol olib, Donbass ozodligini himoya qilayotganiga e’tibor qaratmoqchiman, ularning soni ortib bormoqda. Afsuski, qurbonlar bor”, — deydi Ardzinba.
Ma’lumot uchun Rossiya Abxaziya va Janubiy Osetiya mustaqilligini 2008-yilning avgustida tan olgan. Bu Janubiy Osetiyada qurolli mojaro boshlanib, rus qo‘shinlari “tinchlikni ta’minlash” uchun u yerga kiritilganidan keyin sodir bo‘lgan. Gruziya prezidenti Mixail Saakashvili ushbu hududlarni okkupatsiya qilingan deb atadi hamda Mustaqil Davlatlar Hamdo‘stligi tarkibidan chiqishini ma’lum qildi.
2005-yildayoq Abxaziya aholisining qariyb 95 foizi Rossiya fuqaroligiga ega edi. 2022-yilning 27-sentabr kuni Rossiya tashqi ishlar vaziri Sergey Lavrov Moskvada abxaziyalik hamkasbi bilan uchrashuvda ikki fuqarolik bo‘yicha kelishuv imzolaganini ma’lum qildi. Unda Abxaziya fuqarolari soddalashtirilgan rejimda Rossiya fuqaroligini olishi mumkinligi aytiladi.
Rossiya prezidenti Vladimir Putin 21-sentabr kuni qisman safarbarlik e’lon qilgan edi. Meduza Rossiya prezidenti ma’muriyatiga yaqin manbaga tayanib, Kreml Abxaziya va Janubiy Osetiya aholisini urushga safarbar qilish imkoniyatini ko‘rib chiqayotgani haqida xabar berdi.
Izoh (0)