“Tolibon” Rossiya bilan Afg‘onistonga benzin, dizel yonilg‘isi, gaz va bug‘doy yetkazib berish bo‘yicha dastlabki kelishuvni imzoladi. Bu haqda mamlakatning Savdo va sanoat vaziri vazifasini bajaruvchi Hoji Nuruddin Aziziy Reuters agentligiga ma’lum qildi. Rasmiyning ta’kidlashicha, Rossiya ushbu tovarlarga chegirma taklif qilgan.
Shu tariqa “Tolibon” bir yil avval hokimiyatga kelganidan buyon birinchi yirik xalqaro iqtisodiy kelishuvga erishdi. Hech bir davlat, jumladan Rossiya ham “Tolibon” hukumatini qonuniy deb rasman tan olmaydi. Kreml harakatni terrorchi tashkilot deb biladi, lekin vaqti-vaqti bilan “Tolibon” a’zolarini Moskvada qabul qiladi.
Afg‘onistonlik rasmiyning aytishicha, kelishuv doirasida Rossiya mamlakatga yiliga bir million tonnaga yaqin benzin va dizel yonilg‘isi, 500 ming tonna suyultirilgan gaz va ikki million tonna bug‘doy yetkazib beradi. Shartnomalarda qancha vaqt davom etishi noma’lum sinov muddati ko‘zda tutilgan. Undan keyin uzoq muddatli shartnoma imzolanadi.
Aziziy narxlar va to‘lov usullari haqidagi ma’lumotni oshkor qilmadi. Ammo uning so‘zlariga ko‘ra, Rossiya avtomobil va temiryo‘l orqali yetkazib berish bo‘yicha jahon bozorlari bilan solishtirganda chegirma narxga rozi bo‘lgan.
“Nima qilgan bo‘lsak ham, milliy manfaatlar va xalq manfaatidan kelib chiqyapmiz”, — dedi Aziziy.
Mazkur kelishuvga erishish uchun o‘tgan oy Aziziy boshchiligidagi delegatsiya Moskvaga kelib, bir necha hafta muzokaralar olib borgan edi.
Izoh (0)