AQSH va uning ittifoqchilari razvedka xizmatlari Ukraina hududiga ehtimoliy yadro zarbasi berilishiga tayyorgarlikni aniqlash uchun Rossiya ustidan kuzatuvni kuchaytirdi. Bu haqda AQSHning besh nafar sobiq va amaldagi amaldorlariga tayanib, Politico xabar bermoqda.
Nashr suhbatdoshlarining ogohlantirishicha, yadroviy zarbaga tayyorgarlikning dastlabki belgilari juda kech aniqlanishi mumkin, chunki Rossiyada qit’alararo ballistik raketalardan kichikroq taktik yadro qurollari mavjud.
“Biz buni diqqat bilan kuzatmoqdamiz”, — dedi Rossiyaning yadroviy kuchlari haqidagi razvedka ma’lumotlariga ega amerikalik rasmiy. Kuzatuv havodan, kosmos va kiberkosmosdan amalga oshirilmoqda.
AQSH va uning ittifoqchilari yerdagi Rossiya harbiy bo‘linmalarini tahlil qilish uchun tijoriy sun’iy yo‘ldoshlardan foydalanadi. O‘tgan hafta davomida AQSH razvedka samolyotlari Rossiyaning ikki tomonlama qurol tizimlari va gipertovushli raketalari joylashgan Kaliningrad viloyatida bir necha bor kuzatilgan.
Rossiya Ukrainaga bostirib kirganidan keyin Rossiya prezidenti Vladimir Putin, hukumat amaldorlari va targ‘ibotchilar Rossiya yadro qurolidan foydalanishi mumkinligiga qayta-qayta ishora qildi. 21-sentabr kuni Putin safarbarlik boshlanishi haqidagi murojaatida Rossiya hukumati o‘z hududlarini himoya qilish uchun “ixtiyoridagi barcha vositalarni” ishga solishga tayyorligini aytdi.
27-sentabr kuni o‘zini o‘zi respublika deb e’lon qilgan Donbass respublikalarida, shuningdek, Ukrainaning Xerson va Zaporojye viloyatlarida “Rossiyaga qo‘shilish bo‘yicha referendum”ga ovoz berish yakunlandi. Ovoz berganlarning aksariyati go‘yoki “Rossiyaga qo‘shilish”ni qo‘llab-quvvatlagan. 22-sentabr kuni Rossiya Xavfsizlik Kengashi raisining o‘rinbosari Dmitriy Medvedev ushbu hududlar “Rossiyaga qabul qilingach” ular Rossiya Qurolli Kuchlari tomonidan himoya qilinishini, armiya “har qanday quroldan, shu jumladan strategik yadroviy quroldan” foydalanishi mumkinligini atdi.
Izoh (0)