Birlashgan Millatlar Tashkiloti Xavfsizlik Kengashida nutq so‘zlagan Gaiti rasmiylari mamlakatda gumanitar falokat yuz berayotgani haqida ogohlantirdi, deb yozadi Deutche Welle.
Jahon oziq-ovqat dasturi ma’lumotlariga ko‘ra, bu oy Gaitida talon-torojlar oqibatida kamida 6 million dollarlik yordam, jumladan, 2000 tonna oziq-ovqat yo‘qolgan.
“Iqtisodiy inqiroz, banditizm va siyosiy inqiroz gumanitar falokatga aylanib ketdi. Birgina so‘nggi ikki hafta ichida Jahon oziq-ovqat dasturiga qilingan hujumlar oqibatida qariyb 5 million dollar bahosidagi 2 ming tonna oziq-ovqat yordami yo‘qoldi. Bu kelasi oy davomida 200 mingga yaqin eng nochor gaitiliklarni qo‘llab-quvvatlashga yetgan bo‘lardi”, — dedi Gaitining BMTdagi vakili Helen La Laym.
Gaiti bosh vaziri Ariel Genri mamlakatda yonilg‘i narxi oshishini e’lon qilganidan keyin norozilik va talon-tarojlar boshlangan. Hukumat yonilg‘i subsidiyalarini qisqartirish sababini xarajatlarning ortishi bilan izohlagan.
Gaitining eng yirik sanoat parki Karakol ham ishlashdan to‘xtagan. Tashqi ishlar vaziri Jan Viktor Jeneusning aytishicha, bu 12 ming ish o‘rni yo‘qolishiga sabab bo‘lishi mumkin. Uning so‘zlariga ko‘ra, xususiy kompaniyalar mamlakatni tark etish bilan tahdid qilmoqda, bolalarni maktabga qaytarish imkoniyati endi so‘roq ostida qolmoqda. Avval Gaiti hukumati maktablarni 3-oktabrdan qayta ochishni rejalashtirgan edi.
Gaiti ikki hafta davom etgan zo‘ravonlik va oziq-ovqat omborlariga hujumlardan so'ng “nochorlikning yangi darajasiga” ko‘tarildi, deydi mahalliy rasmiylar. Port-o-Prensdan chiqish yo‘llari bir necha oydan beri jinoiy guruhlar tomonidan to‘sib qo‘yilgan, bu esa xalqaro tashkilotlarning kambag‘allarga oziq-ovqat tarqatish borasidagi sa’y-harakatlarini sekinlashtirmoqda.
Izoh (0)