Rossiyada safarbarlik e’lon qilinganidan keyin xususiy samolyotlarda parvozlarga bo‘lgan talab keskin oshib ketdi. Britaniyaning The Guardian nashri ma’lumotlariga ko‘ra, bunday parvozlarning asosiy yo‘nalishlari Armaniston, Turkiya va Ozarbayjon hisoblanadi, ushbu mamlakatlarga rossiyaliklar vizasiz kirishi mumkin.
Your Charter kompaniyasi direktori Yevgeniy Bikov jurnalistlarga ma’lum qilishicha, safarbarlik e’lon qilingach, parvozlar uchun talabnomalar soni ko‘p marta oshib ketgan. “Odatda biz kuniga 50 tadan talabnoma olgan bo‘lsak, endi esa besh mingtaga yetdi. Vaziyatni mutlaqo aqlga sig‘dirib bo‘lmaydi”, — dedi u.
Bikovning qo‘shimcha qilishicha, uning kompaniyasi talabni qondirish va narxlarni pasaytirish uchun kattaroq sig‘imli samolyotlardan foydalanishni boshlagan, biroq bu ham yetarli bo‘lmayapti. “Biz hamma uchun joy topib berolmayapmiz”, — dedi Bikov.
The Guardian yozishicha, hozir xususiy samolyotdagi bitta joy narxi 1,3—1,5 million rubl (22—25 ming dollar)ga, sakkiz o‘rinli samolyot ijarasi esa 5—9 million rubl (85—150 ming dollar)ga teng.
Xususiy parvozlarga ixtisoslashgan FlightWay kompaniyasi rahbari Eduard Simonov The Guardian’ga ma’lum qilishicha, Armaniston, Turkiya, Qozog‘iston va Dubayga parvozlarga talab “50 karra o‘sgan”. Shuningdek, uning qayd etishicha, Rossiyaga nisbatan xalqaro sanksiyalar joriy etilgach, samolyotlarni ijaraga olish qiyinlashgan. “Xususiy tashuvlar bilan shug‘ullanuvchi Yevropa firmalarining barchasi bozordan ketdi. Hozir taklifdan ko‘ra talab kattaroq, narxlar esa yarim yil avvalgiga nisbatan ancha oshib ketgan”, — dedi Simonov.
The Guardian yozishicha, taxminlarga ko‘ra, urush boshlanganidan keyin Rossiyadan mamlakatda yashovchi millionerlarning 15 foizgacha bo‘lgan qismi ketib qolgan, sentabrda e’lon qilingan safarbarlik esa vaziyatni yanada chuqurlashtirgan bo‘lishi mumkin. Ushbu taxminni Moskvadagi konsyerj-servislardan birining xodimi tasdiqladi.
“Bizning yosh erkak mijozlarimizning ko‘pchiligi o‘tgan hafta Putin safarbarlik e’lon qilganidan keyin ketib qoldi. Avvallari men ular uchun joy band qilish uchun restoran va barlarga qo‘ng‘iroq qilardim. Endi esa ishim ular uchun Yerevanga samolyotda ular uchun oxirgi joyni topish maqsadida reyslar agregatorlarini ko‘rib chiqishdan iborat bo‘lyapti”, — dedi u.
Ammo faqat boy rossiyaliklargina mamlakatni xususiy samolyotlarda tark etayotgani yo‘q. “Kommersant” yozishicha, Rossiya IT-kompaniyalari o‘z xodimlarini mamlakatdan evakuatsiya qilish uchun butun boshli charter reyslarni sotib olmoqda. Gazeta aniqlik kiritishicha, ushbu sanoat ishchilarining ommaviy chiqib ketishi shu bilan bog‘liqki, ularning ko‘pchiligi safarbarlikdan himoyani kafolatlovchi mutaxassisliklarga ega emas.
The Guardian yozishicha, Davlat dumasining ko‘pincha G‘arbga qarshi va vatanparvarlik bayonotlari bilan chiqish qiluvchi deputatining o‘g‘li shunday usul bilan Rossiyani tark etgan. Gazeta ma’lumotlariga ko‘ra, deputat (ismi aytilmagan) o‘g‘lining mamlakatdan qo‘yib yuborilganiga ishonch hosil qilish uchun uni aeroportgacha kuzatib qo‘ygan. Deputatning o‘g‘li Turkiyaga ketayotib, yo‘lda Snapchat’dagi yopiq guruhga “Buyuk qochish”, — deya post qoldirdi.
Izoh (0)