АҚШ БМТ Хавфсизлик кенгашидан Украинанинг босиб олинган ҳудудларида бўлиб ўтган «референдумлар»ни тан олмасликни талаб қилмоқда.
АҚШнинг БМТдаги вакили Линда Томас-Гринфилд маълум қилишича, мамлакат Албания билан биргаликда илгари сурган резолюцияда қуйидагиларга даъват этилади:
- Россиянинг қалбаки «референдумлари»ни қоралаш;
- Украина мақоми билан боғлиқ ҳеч қандай ўзгаришларни тан олмаслик;
- Россияга Украина ҳудудидан ўз қўшинларини олиб кетиш мажбуриятини юклаш.
Референдумлар якунланди
Россия таркибига кириш ҳақидаги референдумларда овоз бериш 27 сентябрь куни якунланди. Кечки вақтга келиб, тўртта ҳудудда ҳам бюллетенларнинг 100 фоизи кўриб чиқилди. Натижаларга кўра, ЛХР, ДХР ва Запорожье вилоятида овоз берганларнинг 90 фоизи, Херсон вилоятида эса 87 фоизи Россияга қўшилишни қўллаб-қувватлади.Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
Россия Федерация кенгаши раиси Валентина Матвиенко юқори палата томонидан янги ҳудудларнинг Россия таркибига кириши ҳақидаги қонунлар кўриб чиқиладиган мажлис 4 октябрда ўтказилиши мумкинлигини айтганди. Шу билан бирга, у режадан ташқари йиғилишлар ўтказиш зарурати йўқлигини таъкидлади.
Агар тўртта ҳудуд аҳолиси Россия таркибига кириш истагини билдирса, бу хоҳиш қўллаб-қувватланишини қайд этганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Изоҳ (0)