Ukrainaning Rossiya kuchlari nazoratidagi Zaporojye atom elektr stansiyasi yana ukrain energetika tizimidan elektr energiyasi olishni boshladi. Bu haqda Atom energiyasi bo‘yicha xalqaro agentlik (MAGATE) ma’lum qildi.
Muhandislar Zaporojye AESni Ukrainaning Kiyev nazoratidagi hududi bilan bog‘lovchi to‘rtta asosiy elektr uzatish liniyalaridan birini ta’mirlagan. Yana uchta asosiy liniya o‘chgan holda qolmoqda.
“ZAESning barcha oltita reaktori ishdan to‘xtagan, biroq xavfsizlikni ta’minlash uchun baribir ularga elektr energiyasi zarur. 5-sentabrdan buyon stansiya maishiy, zavod va boshqa iste’molchilarga elektr energiyasi yetkazib bermayapti”, — deyiladi MAGATE xabarida.
Zaporojye AES Yevropadagi eng yirik atom elektr stansiyasidir. Avgust oyida u muntazam ravishda o‘qqa tutila boshlandi, bunda Rossiya va Ukraina bir-birini aybladi.
1 sentabr kuni MAGATE missiyasi Zaporojye AESga keldi. Agentlik stansiyaning o‘qqa tutilishi Ukraina uchun ham, qo‘shni davlatlar uchun ham jiddiy oqibatlarga olib kelishi mumkin bo‘lgan misli ko‘rilmagan holat ekanini ta’kidlab, atom elektr stansiyasi atrofida zudlik bilan xavfsiz hudud yaratishga chaqirdi.
Stansiya 6-sentabr kuni ishlashdan to‘liq to‘xtadi. Uning so‘nggi energobloki ham o‘chirildi va sovuq holatga o‘tishga tayyorlana boshladi.
Izoh (0)