Yaponiyaning janubi-g‘arbiy qismida o‘ta kuchli “Nanmadol” tayfuni yaqinlashayotgani sababli 2,5 millionga yaqin aholini evakuatsiya qilishga ko‘rsatma berildi.
Xususan, Yaponiyaning Kyusyu orolidagi Kagosima, Miyazdaki va Kumamoto prefekturalari aholisiga uylarini tark etish aytilgan. Evakuatsiya qilinganlar maxsus markazlarga joylashtirilmoqda.
Yaponiya meteorologiya boshqarmasi ma’lumotlariga ko‘ra, tayfun 18-sentabr kuni tushgacha Kagosima shahriga yaqinlashishi kerak. Boshqarma kuchli shamol tufayli turar joy binolarining qulashi mumkinligi haqida ogohlantirdi. Odamlarga xavfsiz boshpana topish va derazalardan uzoqroq turish tavsiya qilindi.
Kyusyuning ba’zi hududlarida shamol tezligi 40 metr / sekundga yetmoqda, shuningdek, kuchli yomg‘ir yog‘moqda. Sinoptiklarning fikricha, tayfun vaqtida Sikoku orolida 500 millimetrgacha, Kyusyu shimoliy hududlarida esa 400 millimetrgacha yog‘ingarchilik yog‘ishi mumkin.
Kyusyu janubidagi to‘lqinlar balandligi hozirda 14 metrga yetmoqda. Meteorologiya byurosi sunami haqida ogohlantirmagan, biroq “rekordni yangilovchi” kuchli yomg‘ir va shamol, shuningdek, baland to‘lqinlar haqida ogohlantirgan.
Reuters ta’kidlashicha, Yaponiya OAVlari “Nanmadol”ni shu mavsumda yuz bergan 14-raqamli tayfun deb atamoqda.
Izoh (0)