Qirg‘izistonda 19-sentabr milliy motam kuni deb e’lon qilindi. Tegishli hujjat respublika prezidenti Sadir Japarov tomonidan imzolangan.
Qirg‘iz-tojik chegarasida 14-sentabr kunidan beri davom etayotgan to‘qnashuvlarda qirg‘iz tomonidan 37 kishi halok bo‘lgani xabar qilingandi. Tojikiston rasmiylari qurbonlar va jarohatlanganlar sonini hali rasman e’lon qilmagan.
AQSH Tojikiston va Qirg‘iziston chegarasidagi mojarodan xavotir bildirdi.
“Biz tojik-qirg‘iz chegarasidagi to‘qnashuvlar haqidagi xabarlardan xavotirdamiz. Tinch aholi hayoti xavf ostida, biz jabrlanganlarga hamdardligimizni izhor qilamiz. Ikki tomonni o‘t ochishni to‘xtatish rejimiga rioya qilishga hamda diplomatiya yo‘li bilan tinchlikni o‘rnatish uchun sa’y-harakatlarini ikki baravar oshirishga chaqiramiz”, — deyiladi AQSH Davlat departamenti vakili Ned Praysning bayonotida.
Qirg‘iziston va Tojikiston o‘rtasidagi chegarada vaziyat 14-sentabr ertalab keskinlashdi. Qirg‘iziston tomoni Tojikiston chegarachilari mamlakatning Botken tumaniga bostirib kirganini, tojik tomoni esa Isfara tumanida chegarachilar o‘qqa tutilganini ma’lum qildi.
Chegarada shiddatli janglar 16-sentabrga o‘tar kechasi yuz berdi. Shu kuni ertalab Tojikiston va Qirg‘iziston prezidentlari Emomali Rahmon va Sadir Japarov o‘t ochishni to‘xtatish haqida kelishib oldi, biroq sal keyinroq tomonlar bir-birini bitimni buzishda aybladi.
Izoh (0)