AQSHning Kaliforniya shtati Los-Anjeles shahri fuqarolaridan biri maymunchechakdan vafot etdi, deb yozadi “Kommersant”. Los-Anjeles jamoatchilik sog‘lig‘ini saqlash departamenti ma’lumotlariga ko‘ra, bemorda “jiddiy immun tanqisligi” yuzaga kelgan, u kasalxonaga yotqizilgan.
Marhum haqida boshqa tafsilotlar keltirilmadi. Bu AQSHda maymunchechak oqibatidagi o‘lim bilan bog‘liq birinchi tasdiqlangan holatdir. Mamlakatda jami 21 985 kishida kasallik qayd etilgan.
Avgust oxirida maymunchechak AQSHning barcha shtatlariga tarqaldi. Jahon sog‘liqni saqlash tashkiloti ma’lumotlariga ko‘ra, kasallikdan o‘lim darajasi 3—6 foizni tashkil etadi.
Avvalroq Texas shtatida ham maymunchechak bilan kasallangan bemor vafot etgandi. Ammo u boshqa bir qancha hamroh kasalliklarga ham chalingan bo‘lgan. Ayni paytda shifokorlar uning o‘limiga aynan nima sabab bo‘lganini aniqlashtirmoqda.
Maymunchechak — odamlarga asosan yovvoyi hayvonlar (kemiruvchilar, maymunlar)dan yuquvchi kamyob virusli kasallik. Uning simptomlari isitma, bosh og‘rig‘i, mushaklar va beldagi og‘riq, limfa tugunlari kattalashishi, varaja va charchoqni o‘z ichiga oladi. Shuningdek, yuzda va tananing boshqa qismlarida toshmalar paydo bo‘lishi mumkin. Maymunchechakka qarshi alohida vaksina yo‘q, biroq tabiiy chechakka qarshi vaksina ushbu kasallikdan 85 foiz darajada himoyani ta’minlaydi.
Izoh (0)