AQSHning Nyu-Jersi shtatida joylashgan, Amerikaning eng nufuzli oliy ta’lim muassasalaridan biri Prinston universiteti oilaviy daromadi 100 ming dollardan oshmaydigan talabalar uchun o‘qish bepul bo‘lishini e’lon qildi. Bungacha faqat ota-onasi yiliga 65 ming dollardan ko‘p daromad olmaydigan talabalargina bepul ta’lim olardi.
Bundan tashqari, oilaviy daromadi 150 ming dollardan oshmaydigan talabalar maxsus stipendiyaga da’vogarlik qilishi mumkin, u ta’lim xarajatlarining bir qismini qoplaydi. “Chirmovuq ligasi” (The Ivy League — AQSHda joylashgan, yuqori sifatli ta’lim berilishi bilan ajralib turuvchi sakkizta xususiy universitetlar uyushmasi)ga kiruvchi Prinston universitetida o‘qish yiliga 80 ming dollargacha tushishi mumkin. CNN xabariga ko‘ra, ushbu universitetning qariyb chorak qismigina bepul o‘qishi mumkin bo‘ladi.
Talabalar ta’lim uchun olgan kreditlarini o‘qish tugaganidan keyin banklarga qaytarishi kerak bo‘ladi, bu ularning zimmasiga og‘ir yuk bo‘lib tushmoqda. Avgust oxirida AQSH prezidenti Jo Bayden ushbu qarzlarni to‘lash imkoniyatiga ega bo‘lmaganlar uchun moliyaviy ko‘mak rejasini taqdim etdi.
Prinston universiteti 1746-yilda Nyu-Jersi kolleji sifatida tashkil etilgan. Uning o‘qituvchilari va bitiruvchilari orasida 75 nafar Nobel mukofoti, 16 nafar Filds mukofoti va 16 nafar Tyuring mukofoti sovrindorlari, ikki nafar AQSH prezidenti va 12 nafar AQSH Oliy sudi a’zolari bor.
Izoh (0)