Armaniston hukumati Ozarbayjonning Tog‘li Qorabog‘dagi xatti-harakatlari yuzasidan Rossiyaga, Kollektiv xavfsizlik shartnomasi tashkiloti (KXShT) va BMT Xavfsizlik kengashiga rasman murojaat qildi, deb yozadi “RBK” Armaniston Jamoatchilik televideniyesiga tayanib.
13-sentabrga o‘tar kechasi Armaniston Xavfsizlik kengashi bosh vazir Nikol Pashinyan raisligi ostida yig‘ilish o‘tkazib, “Ozarbayjonning Armaniston suveren hududiga qarshi tajovuzkor harakatlari”ga qarshi turish bo‘yicha keyingi qadamlarni muhokama qildi.
O‘shanda Yerevan Moskvadan Do‘stlik, hamkorlik va o‘zaro ko‘mak to‘g‘risidagi shartnoma nizomlarini kuchga kiritishni so‘rashini, shuningdek, KXShT va BMT Xavfsizlik kengashiga murojaat qilishini e’lon qilgandi.
AQSH davlat kotibi Entoni Blinken ma’lum qilishicha, Vashington Armaniston-Ozarbayjon chegarasidagi harbiy harakatlar haqidagi xabarlardan, shu jumladan, Armanistondagi aholi punktlari va fuqarolik infratuzilmasiga berilayotgan zarbalar haqidagi axborotdan xavotirda.
“Avval ham ochiqchasiga aytganimizdek, nizoning yechimi harbiy bo‘lishi mumkin emas. Har qanday jangovar harakatlarni zudlik bilan to‘xtatishga qat’iyan da’vat etamiz”, — deyiladi xabarda.
Avvalroq Armaniston Mudofaa vazirligi 13-sentabr kuni yarim tundan keyin Ozarbayjon qo‘shinlari respublika janubi-sharqidagi Sotk, Goris va Jermuk aholi punktlarini artilleriya va yirik kalibrli qurollardan o‘qqa tutishni boshlaganini ma’lum qilgandi.
Pashinyan Rossiya prezidenti Vladimir Putin bilan telefon orqali suhbatlashib, Bokuning xatti-harakatlarini nomaqbul deb atadi. Pashinyan matbuot xizmati yetakchilar tezkor aloqani saqlab turishga kelishib olganini ma’lum qildi.
Ozarbayjon Mudofaa vazirligi Armanistonga bostirib kirgani haqidagi ma’lumotlarni bema’ni deb atab, vaziyat keskinlashuvi uchun javobgarlikni Yerevan zimmasiga yukladi.
Izoh (0)