Eron yadroviy dasturi bo‘yicha Qo‘shma keng qamrovli harakatlar rejasini qayta tiklash bo‘yicha kelishuvlar Tehronning xatti-harakatlari tufayli dargumon bo‘lib qolmoqda. Bu haqda AQSH Davlat kotibi Entoni Blinken Mexiko shahrida AQSH—Meksika iqtisodiy muloqoti yig‘ilishi yakunlari bo‘yicha o‘tkazilgan matbuot anjumanida aytib o‘tdi.
“O‘tgan haftada guvoh bo‘lganimizdek, Eronning Yevropa Ittifoqi taklifiga bergan javobi orqaga qadam tashlash bo‘lmoqda va yaqin muddatda kelishuvga erishish istiqbollarini dargumon qilmoqda”, — dedi Blinken.
Uning ta’kidlashicha, Eron kelishuvga erishish uchun zarur shartlarni bajarishni istamaydi yoki buning uddasidan chiqolmaydi, chunki Tehron mavzudan tashqari bo‘lgan kun tartibini kiritishda davom etmoqda.
“Sizga aniq muddatni ayta olmayman, faqat shuni ta’kidlashim mumkinki, Eron muzokaralar jarayoniga begona masalalarni olib kirishga urinishda davom etar ekan, kelishuvga erishish uchun zarur bo‘lgan harakatlarni yo istamaydi yoki qila olmaydi”, — dedi AQSH Davlat kotibi, muzokaralarni qachon yakunlash mumkinligi haqida berilgan savolga.
Eron yadroviy dasturi bo‘yicha Qo‘shma keng qamrovli harakatlar rejasi 2015-yilda Eron bilan BMT Xavfsizlik Kengashining doimiy besh a’zosi va Germaniya tomonidan yadro inqirozini bartaraf etish maqsadida imzolangan. AQSHning avvalgi prezidenti Donald Tramp 2018-yilda ushbu kelishuvdan chiqishga qaror qilgan edi. Amerikaning amaldagi rahbari Jo Bayden Vashingtonni Tehron yadroviy kelishuviga qaytarishga tayyorligini bir necha bor bildirgan. Rossiya, Buyuk Britaniya, Germaniya, Xitoy, AQSH va Fransiya 2021-yilning aprel oyidan beri Venada Eron bilan yadroviy kelishuvni asl ko‘rinishida tiklash bo‘yicha muzokaralar olib bormoqda.
Izoh (0)