Dunyo bo‘ylab 50 millionga yaqin odam zamonaviy qullikda, deya ma’lum qildi Xalqaro mehnat tashkiloti.
Birlashgan Millatlar Tashkilotining ikki agentligi — Xalqaro mehnat tashkiloti va Xalqaro migratsiya tashkilotining Walk Free Foundation bilan birgalikda olib borgan tadqiqoti shuni ko‘rsatdiki, so‘nggi 5 yil ichida qullikdagi odamlar soni sezilarli darajada oshgan va bu taxminan 50 million kishini tashkil etmoqda. Ularning 28 millioni majburiy mehnatga jalb qilingan, 22 millioni esa majburiy nikohda yashmoqda.
Hisobotda ta’riflanganidek, zamonaviy qullik ikki asosiy komponent — majburiy mehnat va majburiy nikohdan iborat. Ikkalasi ham tahdid, zo‘ravonlik, majburlash, aldash kabilar bilan odamlarni ekspluatatsiya qilishni nazarda tutadi.
Qayd etilishicha, qullikda bo‘lganlar soni 2016—2021-yillar oralig‘ida 10 millionga oshgan. Bunga iqlim o‘zgarishi va koronavirus pandemiyasi ham ta’sir qilgan. Ayollar va bolalar nomutanosib ravishda himoyasizligicha qolmoqda.
“Zamonaviy qullik holati yaxshilanmayotgani odamni dahshatda soladi. Inson huquqlarining bu tarzda buzilishini hech narsa bilan oqlab bo‘lmaydi. Samarali milliy siyosat va tartibga solish asosiy ahamiyatga ega. Ammo hukumatlar buni yolg‘iz uddalay olmaydi. Xalqaro standartlar mustahkam poydevor yaratmoqda va bunga kompleks yondashuv ham zarur. Kasaba uyushmalari, ish beruvchi tashkilotlar, fuqarolik jamiyati va oddiy odamlar bu jarayonda muhim rol o‘ynashi kerak”, — deydi Xalqaro mehnat tashkiloti rahbari Gay Rayder.
Tadqiqot shuni ko‘rsatadiki, zamonaviy qullik dunyoning deyarli barcha mamlakatlarida uchraydi va etnik, madaniy va diniy chegaralarni kesib o‘tadi. Majburiy mehnatning yarmidan ko‘pi, majburiy nikohlarning esa to‘rtdan bir qismi o‘rta yoki yuqori daromadli mamlakatlarda kuzatilmoqda.
BMT ma’lumotlariga ko‘ra, majburiy mehnatga jalb qilinganlarning har sakkiz nafardan biri, ya’ni 3,3 millionga yaqini bolalar bo‘lib, ularning yarmidan ko‘pi jinsiy ekspluatatsiyaga uchragan.
Hisobotda zamonaviy qullikka chek qo‘yish yo‘lida sezilarli yutuqlarni ko‘rsatadigan bir qator tavsiyalar berilgan: qonunlar va mehnat inspeksiyasini takomillashtirish va amalga oshirish; davlat tomonidan majburiy mehnatga chek qo‘yish; biznes va ta’minot zanjirlarida majburiy mehnat va odam savdosiga qarshi kurashni kuchaytirish; ijtimoiy himoyani kengaytirish va huquqiy himoyani kuchaytirish, shu jumladan qonuniy nikoh yoshini istisnosiz 18 yoshga yetkazish.
Izoh (0)