Estoniya Mudofaa vazirligi mamlakatga hududining bir qismi bosib olingan taqdirda partizanlar urushiga tayyorlanish imkonini beruvchi qonun loyihasini tayyorladi, deb yozadi “RBK”.
Hujjat zarur infratuzilma, xususan, maxfiy kvartira va qurolli yashirin joylar tashkil qilib, agentlik tarmog‘i va qurolli qarshilik guruhlarini tayyorlashni ko‘zda tutadi.
Mudofaa vazirligi vakili Margit Gross jurnalistlarga tushuntirishicha, samarali qarshilik ko‘rsatishga tinch davrda tayyorgarlik ko‘rish kerak. Buning uchun harbiylarga ularda hali mavjud bo‘lmagan qo‘shimcha vakolatlar kerak bo‘ladi. Masalan, gap yashirin tashkilotga kiradigan odamlarni jalb qilish haqida bormoqda. Estoniyalik harbiylar hisob-kitoblariga ko‘ra, hamkorlikka fuqarolarning 0,1 foizini jalb etish kerak va ular tinch davrdayoq bir-biri bilan tanish bo‘lishi kerak, shunda urush boshlangan taqdirda ular maslakdoshlar qidirishiga to‘g‘ri kelmaydi.
Mudofaa tadqiqotlari markazi eksperti Ivo Yuurvee ERR’ga ma’lum qilishicha, Mudofaa vazirligi taklifi Boltiqbo‘yi SSSRga qo‘shib olinganidan keyin paydo bo‘lgan “O‘rmon birodarlari”ga o‘xshash harakat tashkil etilishini nazarda tutadi. Biroq o‘shanda partizanlar uchun vaziyat murakkablashishiga ularning saflariga sovet maxsus xizmatlari xodimlari kirib olishi sabab bo‘lgandi.
O‘tgan hafta Estoniyada NATOning qo‘shma harbiy mashg‘ulotlari bo‘lib o‘tdi, unda Buyuk Britaniya, Fransiya va Daniyadan 800 dan ortiq harbiy xizmatchilar qatnashdi, tanklar, bronetransportyorlar, tankka qarshi uskunalar ishtirok etdi. Mashg‘ulotlar mamlakat shimoli-sharqiy qismidagi Tapa shahri yaqinidagi poligonda (Rossiyaning Leningrad viloyati bilan chegaradan taxminan 150 km uzoqlikda) o‘tkazildi.
Izoh (0)